၁. တိဿမေတ္တေယျတ္ထေရအပဒါနံ

၁. ‘‘ပဗ္ဘာရကူဋံ နိဿာယ၊ သောဘိတော နာမ တာပသော၊

ပဝတ္တဖလံ ဘုဉ္ဇိတွာ၊ ဝသတိ ပဗ္ဗတန္တရေ.

၂. ‘‘အဂ္ဂိံ ဒါရုံ အာဟရိတွာ၊ ဥဇ္ဇာလေသိံ အဟံ တဒါ၊

ဥတ္တမတ္ထံ ဂဝေသန္တော၊ ဗြဟ္မလောကူပပတ္တိယာ.

၃. ‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော၊

မမုဒ္ဓရိတုကာမော သော၊ အာဂစ္ဆိ မမ သန္တိကေ.

၄. ‘‘ကိံ ကရောသိ မဟာပုည၊ ဒေဟိ မေ အဂ္ဂိဒါရုကံ၊

အဟမဂ္ဂိံ ပရိစရေ၊ တတော မေ သုဒ္ဓိ ဟောဟိတိ [ဟေဟိတိ (သီ.)].

၅. ‘‘သုဘဒ္ဒကော တွံ မနုဇေ၊ ဒေဝတေ တွံ ပဇာနသိ၊

တုဝံ အဂ္ဂိံ ပရိစရ၊ ဟန္ဒ တေ အဂ္ဂိဒါရုကံ.

၆. ‘‘တတော ကဋ္ဌံ ဂဟေတွာန၊ အဂ္ဂိံ ဥဇ္ဇာလယီ ဇိနော၊

န တတ္ထ ကဋ္ဌံ ပဇ္ဈာယိ၊ ပါဋိဟေရံ မဟေသိနော.

၇. ‘‘န တေ အဂ္ဂိ ပဇ္ဇလတိ၊ အာဟုတီ တေ န ဝိဇ္ဇတိ၊

နိရတ္ထကံ ဝတံ တုယှံ၊ အဂ္ဂိံ ပရိစရဿု မေ.

၈. ‘‘ကီဒိသော သော [တေ (သျာ. က.)] မဟာဝီရ၊ အဂ္ဂိ တဝ ပဝုစ္စတိ၊

မယှမ္ပိ ကထယဿေတံ၊ ဥဘော ပရိစရာမသေ.

၉. ‘‘ဟေတုဓမ္မနိရောဓာယ၊ ကိလေသသမဏာယ စ၊

ဣဿာမစ္ဆရိယံ ဟိတွာ၊ တယော ဧတေ မမာဟုတီ.

၁၀. ‘‘ကီဒိသော တွံ မဟာဝီရ၊ ကထံ ဂေါတ္တောသိ မာရိသ၊

အာစာရပဋိပတ္တိ တေ၊ ဗာဠှံ ခေါ မမ ရုစ္စတိ.

၁၁. ‘‘ခတ္တိယမှိ ကုလေ ဇာတော၊ အဘိညာပါရမိံ ဂတော၊

သဗ္ဗာသဝပရိက္ခီဏော၊ နတ္ထိ ဒါနိ ပုနဗ္ဘဝေါ.

၁၂. ‘‘ယဒိ ဗုဒ္ဓေါသိ သဗ္ဗညူ၊ ပဘင်္ကရ တမောနုဒ၊

နမဿိဿာမိ တံ ဒေဝ၊ ဒုက္ခဿန္တကရော တုဝံ.

၁၃. ‘‘ပတ္ထရိတွာဇိနစမ္မံ၊ နိသီဒနမဒါသဟံ၊

နိသီဒ နာထ သဗ္ဗညု၊ ဥပဋ္ဌိဿာမဟံ တုဝံ.

၁၄. ‘‘နိသီဒိ ဘဂဝါ တတ္ထ၊ အဇိနမှိ သုဝိတ္ထတေ၊

နိမန္တယိတွာ သမ္ဗုဒ္ဓံ၊ ပဗ္ဗတံ အဂမာသဟံ.

၁၅. ‘‘ခါရိဘာရဉ္စ ပူရေတွာ၊ တိန္ဒုကဖလမာဟရိံ၊

မဓုနာ ယောဇယိတွာန၊ ဖလံ ဗုဒ္ဓဿဒါသဟံ.

၁၆. ‘‘မမ နိဇ္ဈာယမာနဿ၊ ပရိဘုဉ္ဇိ တဒါ ဇိနော၊

တတ္ထ စိတ္တံ ပသာဒေသိံ၊ ပေက္ခန္တော လောကနာယကံ.

၁၇. ‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော၊

မမဿမေ နိသီဒိတွာ၊ ဣမာ ဂါထာ အဘာသထ.

၁၈. ‘‘‘ယော မံ ဖလေန တပ္ပေသိ၊ ပသန္နော သေဟိ ပါဏိဘိ၊

တမဟံ ကိတ္တယိဿာမိ၊ သုဏာထ မမ ဘာသတော.

၁၉. ‘‘‘ပဉ္စဝီသတိက္ခတ္တုံ သော၊ ဒေဝရဇ္ဇံ ကရိဿတိ၊

သဟဿက္ခတ္တုံ ရာဇာ စ၊ စက္ကဝတ္တီ ဘဝိဿတိ.

၂၀. ‘‘‘တဿ သင်္ကပ္ပမညာယ၊ ပုဗ္ဗကမ္မသမင်္ဂိနော၊

အန္နံ ပါနဉ္စ ဝတ္ထဉ္စ၊ သယနဉ္စ မဟာရဟံ.

၂၁. ‘‘‘ပုညကမ္မေန သံယုတ္တာ၊ နိဗ္ဗတ္တိဿန္တိ တာဝဒေ၊

သဒါ ပမုဒိတော စာယံ၊ ဘဝိဿတိ အနာမယော.

၂၂. ‘‘‘ဥပပဇ္ဇတိ ယံ ယောနိံ၊ ဒေဝတ္တံ အထ မာနုသံ၊

သဗ္ဗတ္ထ သုခိတော ဟုတွာ၊ မနုဿတ္တံ ဂမိဿတိ.

၂၃. ‘‘‘အဇ္ဈာယကော မန္တဓရော၊ တိဏ္ဏံ ဝေဒါန ပါရဂူ၊

သမ္ဗုဒ္ဓံ ဥပဂန္တွာန၊ အရဟာ သော ဘဝိဿတိ’.

၂၄. ‘‘ယတော သရာမိ အတ္တာနံ၊ ယတော ပတ္တောသ္မိ ဝိညုတံ၊

ဘောဂေ မေ ဦနတာ နတ္ထိ၊ ဖလဒါနဿိဒံ ဖလံ.

၂၅. ‘‘ဝရဓမ္မမနုပ္ပတ္တော၊ ရာဂဒေါသေ သမူဟနိံ၊

သဗ္ဗာသဝပရိက္ခီဏော၊ နတ္ထိ ဒါနိ ပုနဗ္ဘဝေါ.

၂၆. ‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ၊

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ.

၂၇. ‘‘သွာဂတံ ဝတ မေ အာသိ၊ မမ ဗုဒ္ဓဿ သန္တိကေ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ.

၂၈. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ တိဿမေတ္တေယျော ထေရော ဣမာ ဂါထာယော အဘာသိတ္ထာတိ.

တိဿမေတ္တေယျတ္ထေရဿာပဒါနံ ပဌမံ.