၉. သောဏကောဋိဝီသတ္ထေရအပဒါနံ

၄၉. ‘‘ဝိပဿိနော ပါဝစနေ၊ ဧကံ လေဏံ မယာ ကတံ၊

စာတုဒ္ဒိသဿ သံဃဿ၊ ဗန္ဓုမာရာဇဓာနိယာ.

၅၀. ‘‘ဒုဿေဟိ ဘူမိံ လေဏဿ၊ သန္ထရိတွာ ပရိစ္စဇိံ၊

ဥဒဂ္ဂစိတ္တော သုမနော၊ အကာသိံ ပဏိဓိံ တဒါ.

၅၁. ‘‘အာရာဓယေယျံ သမ္ဗုဒ္ဓံ၊ ပဗ္ဗဇ္ဇဉ္စ လဘေယျဟံ၊

အနုတ္တရဉ္စ နိဗ္ဗာနံ၊ ဖုသေယျံ သန္တိမုတ္တမံ.

၅၂. ‘‘တေနေဝ သုက္ကမူလေန၊ ကပ္ပေ [ကပ္ပံ (သီ.)၊ ကပ္ပ (က.)] နဝုတိ သံသရိံ၊

ဒေဝဘူတော မနုဿော စ၊ ကတပုညော ဝိရောစဟံ.

၅၃. ‘‘တတော ကမ္မာဝသေသေန၊ ဣဓ ပစ္ဆိမကေ ဘဝေ၊

စမ္ပာယံ အဂ္ဂသေဋ္ဌိဿ၊ ဇာတောမှိ ဧကပုတ္တကော.

၅၄. ‘‘ဇာတမတ္တဿ မေ သုတွာ၊ ပိတု ဆန္ဒော အယံ အဟု၊

ဒဒါမဟံ ကုမာရဿ၊ ဝီသကောဋီ အနူနကာ.

၅၅. ‘‘စတုရင်္ဂုလာ စ မေ လောမာ၊ ဇာတာ ပါဒတလေ ဥဘော၊

သုခုမာ မုဒုသမ္ဖဿာ၊ တူလာပိစုသမာ သုဘာ.

၅၆. ‘‘အတီတာ နဝုတိ ကပ္ပါ၊ အယံ ဧကော စ ဥတ္တရိ၊

နာဘိဇာနာမိ နိက္ခိတ္တေ၊ ပါဒေ ဘူမျာ အသန္ထတေ.

၅၇. ‘‘အာရာဓိတော မေ သမ္ဗုဒ္ဓေါ၊ ပဗ္ဗဇိံ အနဂါရိယံ၊

အရဟတ္တဉ္စ မေ ပတ္တံ၊ သီတိဘူတောမှိ နိဗ္ဗုတော.

၅၈. ‘‘အဂ္ဂေါ အာရဒ္ဓဝီရိယာနံ၊ နိဒ္ဒိဋ္ဌော သဗ္ဗဒဿိနာ၊

ခီဏာသဝေါမှိ အရဟာ၊ ဆဠဘိညော မဟိဒ္ဓိကော.

၅၉. ‘‘ဧကနဝုတိတော ကပ္ပေ၊ ယံ ဒါနမဒဒိံ တဒါ၊

ဒုဂ္ဂတိံ နာဘိဇာနာမိ၊ လေဏဒါနဿိဒံ ဖလံ.

၆၀. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၆၁. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၆၂. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

၆၃. ‘‘ထေရော ကောဋိဝီသော [ကောဋိဝိသော (သျာ. က.)၊ ကောဠိဝိသော (အညဋ္ဌာနေသု)] သောဏော၊ ဘိက္ခုသံဃဿ အဂ္ဂတော၊

ပဉှံ ပုဋ္ဌော ဝိယာကာသိ၊ အနောတတ္တေ မဟာသရေ’’တိ.

ဣတ္ထံ သုဒံ အာယသ္မာ သောဏော ကောဋိဝီသော ထေရော ဣမာ ဂါထာယော အဘာသိတ္ထာတိ.

သောဏကောဋိဝီသတ္ထေရဿာပဒါနံ နဝမံ.