၁. အဝဋဖလဒါယကတ္ထေရအပဒါနံ

၁. ‘‘သတရံသိ နာမ ဘဂဝါ၊ သယမ္ဘူ အပရာဇိတော၊

ဝိဝေကကာမော သမ္ဗုဒ္ဓေါ၊ ဂေါစရာယာဘိနိက္ခမိ.

၂. ‘‘ဖလဟတ္ထော အဟံ ဒိသွာ၊ ဥပဂစ္ဆိံ နရာသဘံ၊

ပသန္နစိတ္တော သုမနော၊ အဝဋံ [အဝဏ္ဋံ (သီ.)၊ အမ္ဗဋံ (သျာ.)] အဒဒိံ ဖလံ.

၃. ‘‘စတုန္နဝုတိတော ကပ္ပေ၊ ယံ ဖလမဒဒိံ အဟံ၊

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ.

၄. ‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ၊

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ.

၅. ‘‘သွာဂတံ ဝတ မေ အာသိ၊ မမ ဗုဒ္ဓဿ သန္တိကေ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ.

၆. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အဝဋဖလဒါယကော ထေရော ဣမာ ဂါထာယော အဘာသိတ္ထာတိ.

အဝဋဖလဒါယကတ္ထေရဿာပဒါနံ ပဌမံ.