၆. ကဒမ္ဗပုပ္ဖိယတ္ထေရအပဒါနံ
၂၀. ‘‘သုဝဏ္ဏဝဏ္ဏံ သမ္ဗုဒ္ဓံ၊ ဂစ္ဆန္တံ အန္တရာပဏေ၊
ကဉ္စနဂ္ဃိယသင်္ကာသံ၊ ဗာတ္တိံသဝရလက္ခဏံ.
၂၁. ‘‘နိသဇ္ဇ ပါသာဒဝရေ၊ အဒ္ဒသံ လောကနာယကံ၊
ကဒမ္ဗပုပ္ဖံ ပဂ္ဂယှ၊ ဝိပဿိံ အဘိပူဇယိံ.
၂၂. ‘‘ဧကနဝုတိတော ကပ္ပေ၊ ယံ ဗုဒ္ဓမဘိပူဇယိံ၊
ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.
၂၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.
ဣတ္ထံ သုဒံ အာယသ္မာ ကဒမ္ဗပုပ္ဖိယော ထေရော ဣမာ ဂါထာယော အဘာသိတ္ထာတိ.
ကဒမ္ဗပုပ္ဖိယတ္ထေရဿာပဒါနံ ဆဋ္ဌံ.