၁၀. ပိဏ္ဍပါတိကတ္ထေရအပဒါနံ

၃၇. ‘‘တိဿော နာမာသိ သမ္ဗုဒ္ဓေါ၊ ဝိဟာသိ ဝိပိနေ တဒါ၊

တုသိတာ ဟိ ဣဓာဂန္တွာ၊ ပိဏ္ဍပါတံ အဒါသဟံ.

၃၈. ‘‘သမ္ဗုဒ္ဓမဘိဝါဒေတွာ၊ တိဿံ နာမ မဟာယသံ၊

သကံ စိတ္တံ ပသာဒေတွာ၊ တုသိတံ အဂမာသဟံ.

၃၉. ‘‘ဒွေနဝုတေ ဣတော ကပ္ပေ၊ ယံ ဒါနမဒဒိံ တဒါ၊

ဒုဂ္ဂတိံ နာဘိဇာနာမိ၊ ပိဏ္ဍပါတဿိဒံ ဖလံ.

၄၀. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပိဏ္ဍပါတိကော ထေရော ဣမာ ဂါထာယော အဘာသိတ္ထာတိ.

ပိဏ္ဍပါတိကတ္ထေရဿာပဒါနံ ဒသမံ.

သဒ္ဒသညကဝဂ္ဂေါ ဆတ္တိံသတိမော.