၁. ဧကပဒုမိယတ္ထေရအပဒါနံ

၁. ‘‘ပဒုမုတ္တရော နာမ ဇိနော၊ သဗ္ဗဓမ္မာန ပါရဂူ၊

ဘဝါဘဝေ ဝိဘာဝေန္တော၊ တာရေသိ ဇနတံ ဗဟုံ.

၂. ‘‘ဟံသရာဇာ တဒါ ဟောမိ၊ ဒိဇာနံ ပဝရော အဟံ၊

ဇာတဿရံ သမောဂယှ၊ ကီဠာမိ ဟံသကီဠိတံ.

၃. ‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော၊

ဇာတဿရဿ ဥပရိ၊ အာဂစ္ဆိ တာဝဒေ ဇိနော.

၄. ‘‘ဒိသွာနဟံ ဒေဝဒေဝံ၊ သယမ္ဘုံ လောကနာယကံ၊

ဝဏ္ဋေ ဆေတွာန ပဒုမံ၊ သတပတ္တံ မနောရမံ.

၅. ‘‘မုခတုဏ္ဍေန ပဂ္ဂယှ၊ ပသန္နော လောကနာယကေ [ဝိပ္ပသန္နေန စေတသာ (သျာ.)]၊

ဥက္ခိပိတွာန ဂဂဏေ [ဥက္ခိပိတွာ နလာဋေန (က.)]၊ ဗုဒ္ဓသေဋ္ဌံ အပူဇယိံ.

၆. ‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော၊

အန္တလိက္ခေ ဌိတော သတ္ထာ၊ အကာ မေ အနုမောဒနံ.

၇. ‘‘‘ဣမိနာ ဧကပဒုမေန၊ စေတနာပဏိဓီဟိ စ၊

ကပ္ပါနံ သတသဟဿံ၊ ဝိနိပါတံ န ဂစ္ဆသိ’.

၈. ‘‘ဣဒံ ဝတွာန သမ္ဗုဒ္ဓေါ၊ ဇလဇုတ္တမနာမကော၊

မမ ကမ္မံ ပကိတ္တေတွာ၊ အဂမာ ယေန ပတ္ထိတံ.

၉. ‘‘သတသဟဿိတော ကပ္ပေ၊ ယံ ကမ္မမကရိံ တဒါ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၁၀. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဧကပဒုမိယော ထေရော ဣမာ ဂါထာယော အဘာသိတ္ထာတိ.

ဧကပဒုမိယတ္ထေရဿာပဒါနံ ပဌမံ.