၆. ပဘင်္ကရတ္ထေရအပဒါနံ

၅၃. ‘‘ပဒုမုတ္တရဘဂဝတော၊ လောကဇေဋ္ဌဿ တာဒိနော၊

ဝိပိနေ စေတိယံ အာသိ၊ ဝါဠမိဂသမာကုလေ.

၅၄. ‘‘န ကောစိ ဝိသဟိ ဂန္တုံ၊ စေတိယံ အဘိဝန္ဒိတုံ၊

တိဏကဋ္ဌလတောနဒ္ဓံ၊ ပလုဂ္ဂံ အာသိ စေတိယံ.

၅၅. ‘‘ဝနကမ္မိကော တဒါ အာသိံ၊ ပိတုမာတုမတေနဟံ [ပိတုပေတာမဟေနဟံ (သီ.)၊ ပိတာပေတာမဟေနဟံ (သျာ.)]၊

အဒ္ဒသံ ဝိပိနေ ထူပံ၊ လုဂ္ဂံ တိဏလတာကုလံ.

၅၆. ‘‘ဒိသွာနာဟံ ဗုဒ္ဓထူပံ၊ ဂရုစိတ္တံ ဥပဋ္ဌဟိံ၊

ဗုဒ္ဓသေဋ္ဌဿ ထူပေါယံ၊ ပလုဂ္ဂေါ အစ္ဆတီ ဝနေ.

၅၇. ‘‘နစ္ဆန္နံ နပ္ပတိရူပံ၊ ဇာနန္တဿ ဂုဏာဂုဏံ၊

ဗုဒ္ဓထူပံ အသောဓေတွာ၊ အညံ ကမ္မံ ပယောဇယေ.

၅၈. ‘‘တိဏကဋ္ဌဉ္စ ဝလ္လိဉ္စ၊ သောဓယိတွာန စေတိယေ၊

ဝန္ဒိတွာ အဋ္ဌ ဝါရာနိ [အဋ္ဌ ဌာနာနိ (က.)]၊ ပဋိကုဋိကော အဂစ္ဆဟံ.

၅၉. ‘‘တေန ကမ္မေန သုကတေန၊ စေတနာပဏိဓီဟိ စ၊

ဇဟိတွာ မာနုသံ ဒေဟံ၊ တာဝတိံသမဂစ္ဆဟံ.

၆၀. ‘‘တတ္ထ မေ သုကတံ ဗျမှံ၊ သောဝဏ္ဏံ သပဘဿရံ၊

သဋ္ဌိယောဇနမုဗ္ဗိဒ္ဓံ၊ တိံသယောဇနဝိတ္ထတံ.

၆၁. ‘‘တိသတာနိ စ ဝါရာနိ၊ ဒေဝရဇ္ဇမကာရယိံ၊

ပဉ္စဝီသတိက္ခတ္တုဉ္စ၊ စက္ကဝတ္တီ အဟောသဟံ.

၆၂. ‘‘ဘဝါဘဝေ သံသရန္တော၊ မဟာဘောဂံ လဘာမဟံ၊

ဘောဂေ မေ ဦနတာ နတ္ထိ၊ သောဓနာယ ဣဒံ ဖလံ.

၆၃. ‘‘သိဝိကာ ဟတ္ထိခန္ဓေန၊ ဝိပိနေ ဂစ္ဆတော မမ၊

ယံ ယံ ဒိသာဟံ ဂစ္ဆာမိ၊ သရဏံ သမ္ပတေ [သိဇ္ဈတေ (က.)] ဝနံ.

၆၄. ‘‘ခါဏုံ ဝါ ကဏ္ဋကံ ဝါပိ၊ နာဟံ ပဿာမိ စက္ခုနာ၊

ပုညကမ္မေန သံယုတ္တော၊ သယမေဝါပနီယရေ.

၆၅. ‘‘ကုဋ္ဌံ ဂဏ္ဍော ကိလာသော စ၊ အပမာရော ဝိတစ္ဆိကာ၊

ဒဒ္ဒု ကစ္ဆု [ကဏ္ဍု (သျာ.)] စ မေ နတ္ထိ၊ သောဓနာယ ဣဒံ ဖလံ.

၆၆. ‘‘အညမ္ပိ မေ အစ္ဆရိယံ၊ ဗုဒ္ဓထူပဿ သောဓနေ [ဗုဒ္ဓထူပမှိ သောဓိတေ (သျာ.)]၊

နာဘိဇာနာမိ မေ ကာယေ၊ ဇာတံ ပိဠကဗိန္ဒုကံ.

၆၇. ‘‘အညမ္ပိ မေ အစ္ဆရိယံ၊ ဗုဒ္ဓထူပမှိ သောဓိတေ [သဗ္ဗတ္ထပိ ဧဝမေဝ ဒိဿတိ၊ တထာ ဥပရိပိ]၊

ဒုဝေ ဘဝေ သံသရာမိ၊ ဒေဝတ္တေ အထ မာနုသေ.

၆၈. ‘‘အညမ္ပိ မေ အစ္ဆရိယံ၊ ဗုဒ္ဓထူပမှိ သောဓိတေ၊

သုဝဏ္ဏဝဏ္ဏော သဗ္ဗတ္ထ၊ သပ္ပဘာသော ဘဝါမဟံ.

၆၉. ‘‘အညမ္ပိ မေ အစ္ဆရိယံ၊ ဗုဒ္ဓထူပမှိ သောဓိတေ၊

အမနာပံ ဝိဝဇ္ဇတိ၊ မနာပံ ဥပတိဋ္ဌတိ.

၇၀. ‘‘အညမ္ပိ မေ အစ္ဆရိယံ၊ ဗုဒ္ဓထူပမှိ သောဓိတေ၊

ဝိသုဒ္ဓံ ဟောတိ မေ စိတ္တံ၊ ဧကဂ္ဂံ သုသမာဟိတံ.

၇၁. ‘‘အညမ္ပိ မေ အစ္ဆရိယံ၊ ဗုဒ္ဓထူပမှိ သောဓိတေ၊

ဧကာသနေ နိသီဒိတွာ၊ အရဟတ္တမပါပုဏိံ.

၇၂. ‘‘သတသဟဿိတော ကပ္ပေ၊ ယံ ကမ္မမကရိံ တဒါ၊

ဒုဂ္ဂတိံ နာဘိဇာနာမိ၊ သောဓနာယ ဣဒံ ဖလံ.

၇၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပဘင်္ကရော ထေရော ဣမာ ဂါထာယော အဘာသိတ္ထာတိ.

ပဘင်္ကရတ္ထေရဿာပဒါနံ ဆဋ္ဌံ.