၃. ဟာသဇနကတ္ထေရအပဒါနံ

၁၃. ‘‘ဒုမဂ္ဂေ ပံသုကူလကံ [ပံသုကူလိကံ (သျာ. က.)]၊ လဂ္ဂံ ဒိသွာန သတ္ထုနော၊

အဉ္ဇလိံ ပဂ္ဂဟေတွာန၊ ဘိယျော ဥစ္စာရိတံ မယာ.

၁၄. ‘‘ဒူရတော ပန ဒိသွာန [ပတိဒိသွာန (သီ. သျာ.)]၊ ဟာသော မေ ဥဒပဇ္ဇထ၊

အဉ္ဇလိံ ပဂ္ဂဟေတွာန၊ ဘိယျော စိတ္တံ ပသာဒယိံ.

၁၅. ‘‘ဧကနဝုတိတော ကပ္ပေ၊ ယံ သညမလဘိံ တဒါ၊

ဒုဂ္ဂတိံ နာဘိဇာနာမိ၊ ဗုဒ္ဓသညာယိဒံ ဖလံ.

၁၆. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဟာသဇနကော ထေရော ဣမာ ဂါထာယော အဘာသိတ္ထာတိ.

ဟာသဇနကတ္ထေရဿာပဒါနံ တတိယံ.