၁. ဥမာပုပ္ဖိယတ္ထေရအပဒါနံ

၁. ‘‘သမာဟိတံ သမာပန္နံ၊ သိဒ္ဓတ္ထမပရာဇိတံ၊

သမာဓိနာ ဥပဝိဋ္ဌံ၊ အဒ္ဒသာဟံ နရုတ္တမံ.

၂. ‘‘ဥမာပုပ္ဖံ ဂဟေတွာန၊ ဗုဒ္ဓဿ အဘိရောပယိံ၊

သဗ္ဗပုပ္ဖါ ဧကသီသာ၊ ဥဒ္ဓံဝဏ္ဋာ အဓောမုခါ.

၃. ‘‘သုစိတ္တာ ဝိယ တိဋ္ဌန္တေ၊ အာကာသေ ပုပ္ဖသန္ထရာ၊

တေန စိတ္တပ္ပသာဒေန၊ တုသိတံ ဥပပဇ္ဇဟံ.

၄. ‘‘စတုန္နဝုတိတော ကပ္ပေ၊ ယံ ပုပ္ဖမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၅. ‘‘ပဉ္စပညာသိတော ကပ္ပေ၊ ဧကော အာသိံ မဟီပတိ၊

သမန္တဆဒနော နာမ၊ စက္ကဝတ္တီ မဟဗ္ဗလော.

၆. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ.

ဣတ္ထံ သုဒံ အာယသ္မာ ဥမာပုပ္ဖိယော ထေရော ဣမာ ဂါထာယော အဘာသိတ္ထာတိ.

ဥမာပုပ္ဖိယတ္ထေရဿာပဒါနံ ပဌမံ.