၅. ဖလဒါယကတ္ထေရအပဒါနံ

၂၀. ‘‘ဘာဂီရထီနဒီတီရေ၊ အဟောသိ အဿမော တဒါ၊

တမဟံ အဿမံ ဂစ္ဆိံ၊ ဖလဟတ္ထော အပေက္ခဝါ.

၂၁. ‘‘ဝိပဿိံ တတ္ထ အဒ္ဒက္ခိံ၊ ပီတရံသိံဝ ဘာဏုမံ၊

ယံ မေ အတ္ထိ ဖလံ သဗ္ဗံ၊ အဒါသိံ သတ္ထုနော အဟံ.

၂၂. ‘‘ဧကနဝုတိတော ကပ္ပေ၊ ယံ ဖလံ အဒဒိံ တဒါ၊

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ.

၂၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဖလဒါယကော ထေရော ဣမာ ဂါထာယော အဘာသိတ္ထာတိ.

ဖလဒါယကတ္ထေရဿာပဒါနံ ပဉ္စမံ.