၁၀. ပဗ္ဘာရဒါယကတ္ထေရအပဒါနံ

၄၇. ‘‘ပိယဒဿိနော ဘဂဝတော၊ ပဗ္ဘာရော သောဓိတော မယာ၊

ဃဋကဉ္စ ဥပဋ္ဌာသိံ၊ ပရိဘောဂါယ တာဒိနော.

၄၈. ‘‘တံ မေ ဗုဒ္ဓေါ ဝိယာကာသိ၊ ပိယဒဿီ မဟာမုနိ၊

သဟဿကဏ္ဍော သတဘေဏ္ဍု [သတဂေဏ္ဍု (သျာ. က.)]၊ ဓဇာလု ဟရိတာမယော.

၄၉. ‘‘နိဗ္ဗတ္တိဿတိ သော ယူပေါ၊ ရတနဉ္စ အနပ္ပကံ၊

ပဗ္ဘာရဒါနံ ဒတွာန၊ ကပ္ပံ သဂ္ဂမှိ မောဒဟံ.

၅၀. ‘‘ဣတော ဗာတ္တိံသကပ္ပမှိ၊ သုသုဒ္ဓေါ နာမ ခတ္တိယော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၅၁. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပဗ္ဘာရဒါယကော ထေရော ဣမာ ဂါထာယော အဘာသိတ္ထာတိ.

ပဗ္ဘာရဒါယကတ္ထေရဿာပဒါနံ ဒသမံ.

ပဒုမကေသရဝဂ္ဂေါ ဧကတိံသတိမော.