၄. သဒ္ဒသညကတ္ထေရအပဒါနံ

၁၇. ‘‘အနုဂ္ဂတမှိ အာဒိစ္စေ၊ ပနာဒေါ [ပသာဒေါ (သျာ. အဋ္ဌ.)] ဝိပုလော အဟု၊

ဗုဒ္ဓသေဋ္ဌဿ လောကမှိ၊ ပါတုဘာဝေါ မဟေသိနော.

၁၈. ‘‘ဃောသ [သဒ္ဒ (သီ. သျာ.)] မဿောသဟံ တတ္ထ၊ န စ ပဿာမိ တံ ဇိနံ၊

မရဏဉ္စ အနုပ္ပတ္တော၊ ဗုဒ္ဓသညမနုဿရိံ.

၁၉. ‘‘စတုန္နဝုတိတော ကပ္ပေ၊ ယံ သညမလဘိံ တဒါ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၂၀. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သဒ္ဒသညကော ထေရော ဣမာ ဂါထာယော အဘာသိတ္ထာတိ.

သဒ္ဒသညကတ္ထေရဿာပဒါနံ စတုတ္ထံ.