၉. ဧကဉ္ဇလိကတ္ထေရအပဒါနံ

၁၈၀. ‘‘သုဝဏ္ဏဝဏ္ဏံ သမ္ဗုဒ္ဓံ၊ ဂစ္ဆန္တံ အန္တရာပဏေ၊

ဝိပဿိံ သတ္ထဝါဟဂ္ဂံ၊ နရဝရံ ဝိနာယကံ.

၁၈၁. ‘‘အဒန္တဒမနံ တာဒိံ၊ မဟာဝါဒိံ မဟာမတိံ၊

ဒိသွာ ပသန္နော သုမနော၊ ဧကဉ္ဇလိမကာသဟံ.

၁၈၂. ‘‘ဧကနဝုတိတော ကပ္ပေ၊ ယမဉ္ဇလိံ ကရိံ [ယံ အဉ္ဇလိမကရိံ (သျာ.)၊ အဉ္ဇလိမကရိံ (က.)] တဒါ၊

ဒုဂ္ဂတိံ နာဘိဇာနာမိ၊ အဉ္ဇလိဿ ဣဒံ ဖလံ.

၁၈၃. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဧကဉ္ဇလိကော ထေရော ဣမာ ဂါထာယော အဘာသိတ္ထာတိ.

ဧကဉ္ဇလိကတ္ထေရဿာပဒါနံ နဝမံ.