၂. ဥပဝါနတ္ထေရအပဒါနံ

၅၂. ‘‘ပဒုမုတ္တရော နာမ ဇိနော၊ သဗ္ဗဓမ္မာန ပါရဂူ၊

ဇလိတွာ အဂ္ဂိက္ခန္ဓောဝ၊ သမ္ဗုဒ္ဓေါ ပရိနိဗ္ဗုတော.

၅၃. ‘‘မဟာဇနာ သမာဂမ္မ၊ ပူဇယိတွာ တထာဂတံ၊

စိတံ ကတွာန သုကတံ၊ သရီရံ အဘိရောပယုံ.

၅၄. ‘‘သရီရကိစ္စံ ကတွာန၊ ဓာတုံ တတ္ထ သမာနယုံ၊

သဒေဝမာနုသာ သဗ္ဗေ၊ ဗုဒ္ဓထူပံ အကံသု တေ.

၅၅. ‘‘ပဌမာ ကဉ္စနမယာ၊ ဒုတိယာသိ မဏီမယာ၊

တတိယာ ရူပိယမယာ၊ စတုတ္ထီ ဖလိကာမယာ.

၅၆. ‘‘တထာ [တတ္ထ (သျာ. က.)] ပဉ္စမိယာ ဘူမိ [နေမိ (သီ.)]၊ လောဟိတင်္ဂမယာ အဟု၊

ဆဋ္ဌာ မသာရဂလ္လဿ၊ သဗ္ဗရတနမယူပရိ.

၅၇. ‘‘ဇင်္ဃာ မဏိမယာ အာသိ၊ ဝေဒိကာ ရတနမယာ၊

သဗ္ဗသောဏ္ဏမယော ထူပေါ၊ ဥဒ္ဓံ ယောဇနမုဂ္ဂတော.

၅၈. ‘‘ဒေဝါ တတ္ထ သမာဂန္တွာ၊ ဧကတော မန္တယုံ တဒါ၊

မယမ္ပိ ထူပံ ကဿာမ၊ လောကနာထဿ တာဒိနော.

၅၉. ‘‘ဓာတု အာဝေဏိကာ နတ္ထိ၊ သရီရံ ဧကပိဏ္ဍိတံ၊

ဣမမှိ ဗုဒ္ဓထူပမှိ၊ ကဿာမ ကဉ္စုကံ မယံ.

၆၀. ‘‘ဒေဝါ သတ္တဟိ ရတ္နေဟိ [သတ္တရတနေဟိ (သီ.)]၊ အညံ ဝဍ္ဎေသု ယောဇနံ၊

ထူပေါ ဒွိယောဇနုဗ္ဗေဓော၊ တိမိရံ ဗျပဟန္တိ သော.

၆၁. ‘‘နာဂါ တတ္ထ သမာဂန္တွာ၊ ဧကတော မန္တယုံ တဒါ၊

မနုဿာ စေဝ ဒေဝါ စ၊ ဗုဒ္ဓထူပံ အကံသု တေ.

၆၂. ‘‘မာ နော ပမတ္တာ အဿုမှ [အဿုမှာ (သီ. သျာ.)၊ အာသိမှာ (?)]၊ အပ္ပမတ္တာ သဒေဝကာ၊

မယမ္ပိ ထူပံ ကဿာမ၊ လောကနာထဿ တာဒိနော.

၆၃. ‘‘ဣန္ဒနီလံ မဟာနီလံ၊ အထော ဇောတိရသံ မဏိံ၊

ဧကတော သန္နိပါတေတွာ၊ ဗုဒ္ဓထူပံ အဆာဒယုံ.

၆၄. ‘‘သဗ္ဗံ မဏိမယံ အာသိ၊ တာဝတာ ဗုဒ္ဓစေတိယံ၊

တိယောဇနသမုဗ္ဗိဒ္ဓံ [တီဏိ ယောဇနမုဗ္ဗိဒ္ဓံ (သီ. က.)]၊ အာလောကကရဏံ တဒါ.

၆၅. ‘‘ဂရုဠာ စ သမာဂန္တွာ၊ ဧကတော မန္တယုံ တဒါ၊

မနုဿာ ဒေဝါ နာဂါ စ၊ ဗုဒ္ဓထူပံ အကံသု တေ.

၆၆. ‘‘‘မာ နော ပမတ္တာ အဿုမှ၊ အပ္ပမတ္တာ သဒေဝကာ၊

မယမ္ပိ ထူပံ ကဿာမ၊ လောကနာထဿ တာဒိနော’.

၆၇. ‘‘သဗ္ဗံ မဏိမယံ ထူပံ၊ အကရုံ တေ စ ကဉ္စုကံ [သဗ္ဗမဏိမယံ ထူပေ၊ အကရုတ္တရကဉ္စုကံ (သီ.)]၊

ယောဇနံ တေပိ ဝဍ္ဎေသုံ၊ အာယတံ ဗုဒ္ဓစေတိယံ.

၆၈. ‘‘စတုယောဇနမုဗ္ဗိဒ္ဓေါ၊ ဗုဒ္ဓထူပေါ ဝိရောစတိ၊

ဩဘာသေတိ ဒိသာ သဗ္ဗာ၊ သတရံသီဝ ဥဂ္ဂတော.

၆၉. ‘‘ကုမ္ဘဏ္ဍာ စ သမာဂန္တွာ၊ ဧကတော မန္တယုံ တဒါ၊

မနုဿာ စေဝ ဒေဝါ စ၊ နာဂါ စ ဂရုဠာ တထာ.

ပစ္စေကံ ဗုဒ္ဓသေဋ္ဌဿ၊ အကံသု ထူပမုတ္တမံ.

၇၀. ‘‘‘မာ နော ပမတ္တာ အဿုမှ၊ အပ္ပမတ္တာ သဒေဝကာ၊

မယမ္ပိ ထူပံ ကဿာမ၊ လောကနာထဿ တာဒိနော၊

ရတနေဟိ ဆာဒေဿာမ၊ အာယတံ ဗုဒ္ဓစေတိယံ’.

၇၁. ‘‘ယောဇနံ တေပိ ဝဍ္ဎေသုံ၊ အာယတံ ဗုဒ္ဓစေတိယံ၊

ပဉ္စယောဇနမုဗ္ဗိဒ္ဓေါ၊ ထူပေါ ဩဘာသတေ တဒါ.

၇၂. ‘‘ယက္ခာ တတ္ထ သမာဂန္တွာ၊ ဧကတော မန္တယုံ တဒါ၊

မနုဿာ ဒေဝါ နာဂါ စ၊ ဂရုဠာ ကုမ္ဘအဏ္ဍကာ.

၇၃. ‘‘ပစ္စေကံ ဗုဒ္ဓသေဋ္ဌဿ၊ အကံသု ထူပမုတ္တမံ၊

‘မာ နော ပမတ္တာ အဿုမှ၊ အပ္ပမတ္တာ သဒေဝကာ.

၇၄. ‘‘‘မယမ္ပိ ထူပံ ကဿာမ၊ လောကနာထဿ တာဒိနော၊

ဖလိကာဟိ ဆာဒေဿာမ၊ အာယတံ ဗုဒ္ဓစေတိယံ’.

၇၅. ‘‘ယောဇနံ တေပိ ဝဍ္ဎေသုံ၊ အာယတံ ဗုဒ္ဓစေတိယံ၊

ဆ ယောဇနာနိ ဥဗ္ဗိဒ္ဓေါ၊ ထူပေါ ဩဘာသတေ တဒါ.

၇၆. ‘‘ဂန္ဓဗ္ဗာ စ သမာဂန္တွာ၊ ဧကတော မန္တယုံ တဒါ၊

‘မနုဇာ ဒေဝတာ နာဂါ၊ ဂရုဠာ ကုမ္ဘယက္ခကာ.

၇၇. ‘‘‘သဗ္ဗေကံသု ဗုဒ္ဓထူပံ၊ မယမေတ္ထ အကာရကာ၊

မယမ္ပိ ထူပံ ကဿာမ၊ လောကနာထဿ တာဒိနော’.

၇၈. ‘‘ဝေဒိယော သတ္တ ကတွာန၊ ဆတ္တမာရောပယိံသု တေ၊

သဗ္ဗသောဏ္ဏမယံ ထူပံ၊ ဂန္ဓဗ္ဗာ ကာရယုံ တဒါ.

၇၉. ‘‘သတ္တယောဇနမုဗ္ဗိဒ္ဓေါ၊ ထူပေါ ဩဘာသတေ တဒါ၊

ရတ္တိန္ဒိဝါ န ဉာယန္တိ၊ အာလောကော ဟောတိ [အာလောကာ ဟောန္တိ (သျာ. က.)] သဗ္ဗဒါ.

၈၀. ‘‘အဘိဘောန္တိ န တဿာဘာ၊ စန္ဒသူရာ သတာရကာ၊

သမန္တာ ယောဇနသတေ၊ ပဒီပေါပိ န ပဇ္ဇလိ.

၈၁. ‘‘တေန ကာလေန ယေ ကေစိ၊ ထူပံ ပူဇေန္တိ မာနုသာ၊

န တေ ထူပမာရုဟန္တိ၊ အမ္ဗရေ ဥက္ခိပန္တိ တေ.

၈၂. ‘‘ဒေဝေဟိ ဌပိတော ယက္ခော၊ အဘိသမ္မတနာမကော၊

ဓဇံ ဝါ ပုပ္ဖဒါမံ ဝါ၊ အဘိရောပေတိ ဥတ္တရိ.

၈၃. ‘‘န တေ ပဿန္တိ တံ ယက္ခံ၊ ဒါမံ ပဿန္တိ ဂစ္ဆတော၊

ဧဝံ ပဿိတွာ ဂစ္ဆန္တာ၊ သဗ္ဗေ ဂစ္ဆန္တိ သုဂ္ဂတိံ.

၈၄. ‘‘ဝိရုဒ္ဓါ [ဝိသဒ္ဓါ (သီ.)] ယေ ပါဝစနေ၊ ပသန္နာ ယေ စ သာသနေ၊

ပါဋိဟေရံ ဒဋ္ဌုကာမာ၊ ထူပံ ပူဇေန္တိ မာနုသာ.

၈၅. ‘‘နဂရေ ဟံသဝတိယာ၊ အဟောသိံ ဘတကော [ဝရကော (သျာ. က.)] တဒါ၊

အာမောဒိတံ ဇနံ ဒိသွာ၊ ဧဝံ စိန္တေသဟံ တဒါ.

၈၆. ‘‘‘ဥဠာရော ဘဂဝါ ဟေသော၊ ယဿ ဓာတုဓရေဒိသံ၊

ဣမာ စ ဇနတာ တုဋ္ဌာ၊ ကာရံ ကုဗ္ဗံ န တပ္ပရေ [ကုဗ္ဗန္တနပ္ပကံ (သီ.)].

၈၇. ‘‘‘အဟမ္ပိ ကာရံ ကဿာမိ၊ လောကနာထဿ တာဒိနော၊

တဿ ဓမ္မေသု ဒါယာဒေါ၊ ဘဝိဿာမိ အနာဂတေ’.

၈၈. ‘‘သုဓောတံ ရဇကေနာဟံ၊ ဥတ္တရေယျပဋံ မမ၊

ဝေဠဂ္ဂေ အာလဂေတွာန၊ ဓဇံ ဥက္ခိပိမမ္ဗရေ.

၈၉. ‘‘အဘိသမ္မတကော ဂယှ၊ အမ္ဗရေဟာသိ မေ ဓဇံ၊

ဝါတေရိတံ ဓဇံ ဒိသွာ၊ ဘိယျော ဟာသံ ဇနေသဟံ.

၉၀. ‘‘တတ္ထ စိတ္တံ ပသာဒေတွာ၊ သမဏံ ဥပသင်္ကမိံ၊

တံ ဘိက္ခုံ အဘိဝါဒေတွာ၊ ဝိပါကံ ပုစ္ဆဟံ ဓဇေ.

၉၁. ‘‘သော မေ ကထေသိ အာနန္ဒ၊ ပီတိသဉ္ဇနနံ မမ၊

‘တဿ ဓဇဿ ဝိပါကံ၊ အနုဘောဿသိ သဗ္ဗဒါ.

၉၂. ‘‘‘ဟတ္ထီ အဿာ ရထာ ပတ္တီ၊ သေနာ စ စတုရင်္ဂိနီ၊

ပရိဝါရေဿန္တိ တံ နိစ္စံ၊ ဓဇဒါနဿိဒံ ဖလံ.

၉၃. ‘‘‘သဋ္ဌိတူရိယသဟဿာနိ၊ ဘေရိယော သမလင်္ကတာ၊

ပရိဝါရေဿန္တိ တံ နိစ္စံ၊ ဓဇဒါနဿိဒံ ဖလံ.

၉၄. ‘‘‘ဆဠာသီတိသဟဿာနိ၊ နာရိယော သမလင်္ကတာ၊

ဝိစိတ္တဝတ္ထာဘရဏာ၊ အာမုတ္တမဏိကုဏ္ဍလာ.

၉၅. ‘‘‘အဠာရပမှာ ဟသုလာ၊ သုသညာ တနုမဇ္ဈိမာ၊

ပရိဝါရေဿန္တိ တံ နိစ္စံ၊ ဓဇဒါနဿိဒံ ဖလံ.

၉၆. ‘‘‘တိံသကပ္ပသဟဿာနိ၊ ဒေဝလောကေ ရမိဿသိ၊

အသီတိက္ခတ္တုံ ဒေဝိန္ဒော၊ ဒေဝရဇ္ဇံ ကရိဿသိ.

၉၇. ‘‘‘သဟဿက္ခတ္တုံ ရာဇာ စ၊ စက္ကဝတ္တီ ဘဝိဿသိ၊

ပဒေသရဇ္ဇံ ဝိပုလံ၊ ဂဏနာတော အသင်္ခိယံ.

၉၈. ‘‘‘ကပ္ပသတသဟဿမှိ၊ ဩက္ကာကကုလသမ္ဘဝေါ၊

ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ.

၉၉. ‘‘‘ဒေဝလောကာ စဝိတွာန၊ သုက္ကမူလေန စောဒိတော၊

ပုညကမ္မေန သံယုတ္တော၊ ဗြဟ္မဗန္ဓု ဘဝိဿသိ.

၁၀၀. ‘‘‘အသီတိကောဋိံ ဆဍ္ဍေတွာ၊ ဒါသေ ကမ္မကရေ ဗဟူ၊

ဂေါတမဿ ဘဂဝတော၊ သာသနေ ပဗ္ဗဇိဿသိ.

၁၀၁. ‘‘‘အာရာဓယိတွာ သမ္ဗုဒ္ဓံ၊ ဂေါတမံ သကျပုင်္ဂဝံ၊

ဥပဝါနောတိ နာမေန၊ ဟေဿသိ သတ္ထု သာဝကော’.

၁၀၂. ‘‘သတသဟဿေ ကတံ ကမ္မံ၊ ဖလံ ဒဿေသိ မေ ဣဓ၊

သုမုတ္တော သရဝေဂေါဝ ကိလေသေ ဈာပယီ မမ.

၁၀၃. ‘‘စက္ကဝတ္တိဿ သန္တဿ၊ စတုဒီပိဿရဿ မေ၊

တိယောဇနာနိ သမန္တာ၊ ဥဿီသန္တိ ဓဇာ သဒါ.

၁၀၄. ‘‘သတသဟဿိတော ကပ္ပေ၊ ယံ ကမ္မမကရိံ တဒါ၊

ဒုဂ္ဂတိံ နာဘိဇာနာမိ၊ ဓဇဒါနဿိဒံ ဖလံ.

၁၀၅. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဥပဝါနော ထေရော ဣမာ ဂါထာယော အဘာသိတ္ထာတိ.

ဥပဝါနတ္ထေရဿာပဒါနံ ဒုတိယံ.