၁၀. ပုဗ္ဗင်္ဂမိယတ္ထေရအပဒါနံ

၄၃. ‘‘စုလ္လာသီတိသဟဿာနိ၊ ပဗ္ဗဇိမှ အကိဉ္စနာ၊

တေသံ ပုဗ္ဗင်္ဂမော အာသိံ၊ ဥတ္တမတ္ထဿ ပတ္တိယာ.

၄၄. ‘‘သရာဂါ သဘဝါ [သမောဟာ (သျာ.)] စေတေ၊ ဝိပ္ပသန္နမနာဝိလာ၊

ဥပဋ္ဌဟိံသု သက္ကစ္စံ၊ ပသန္နာ သေဟိ ပါဏိဘိ.

၄၅. ‘‘ခီဏာသဝါ ဝန္တဒေါသာ၊ ကတကိစ္စာ အနာသဝါ၊

ဖရိံသု မေတ္တစိတ္တေန၊ သယမ္ဘူ အပရာဇိတာ.

၄၆. ‘‘တေသံ ဥပဋ္ဌဟိတွာန၊ သမ္ဗုဒ္ဓါနံ ပတိဿတော၊

မရဏဉ္စ အနုပ္ပတ္တော၊ ဒေဝတ္တဉ္စ အဂမှသေ.

၄၇. ‘‘စတုန္နဝုတိတော ကပ္ပေ၊ ယံ သီလမနုပါလယိံ၊

ဒုဂ္ဂတိံ နာဘိဇာနာမိ၊ သညမဿ ဣဒံ ဖလံ.

၄၈. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပုဗ္ဗင်္ဂမိယော ထေရော ဣမာ ဂါထာယော အဘာသိတ္ထာတိ.

ပုဗ္ဗင်္ဂမိယတ္ထေရဿာပဒါနံ ဒသမံ.

ပဏ္ဏဒါယကဝဂ္ဂေါ ဧကူနတိံသတိမော.