၇. စိတကပူဇကတ္ထေရအပဒါနံ

၂၇. ‘‘စန္ဒဘာဂါနဒီတီရေ၊ အနုသောတံ ဝဇာမဟံ၊

သတ္တ မာလုဝပုပ္ဖါနိ၊ စိတမာရောပယိံ အဟံ.

၂၈. ‘‘စတုန္နဝုတိတော ကပ္ပေ၊ စိတကံ ယမပူဇယိံ၊

ဒုဂ္ဂတိံ နာဘိဇာနာမိ၊ စိတပူဇာယိဒံ ဖလံ.

၂၉. ‘‘သတ္တသဋ္ဌိမှိတော ကပ္ပေ၊ ပဋိဇဂ္ဂသနာမကာ၊

သတ္တရတနသမ္ပန္နာ၊ သတ္တာသုံ စက္ကဝတ္တိနော [ပဋိဇဂ္ဂသနာမကော၊ သတ္တရတနသမ္ပန္နော၊ စက္ကဝတ္တီ မဟဗ္ဗလော (သျာ.)].

၃၀. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ စိတကပူဇကော ထေရော ဣမာ ဂါထာယော အဘာသိတ္ထာတိ.

စိတကပူဇကတ္ထေရဿာပဒါနံ သတ္တမံ.