၁၀. တရဏီယတ္ထေရအပဒါနံ

၃၈. ‘‘မဟာပထမှိ ဝိသမေ၊ သေတု ကာရာပိတော မယာ၊

တရဏတ္ထာယ လောကဿ၊ ပသန္နော သေဟိ ပါဏိဘိ.

၃၉. ‘‘ဧကနဝုတိတော ကပ္ပေ၊ ယော သေတု ကာရိတော မယာ၊

ဒုဂ္ဂတိံ နာဘိဇာနာမိ၊ သေတုဒါနဿိဒံ ဖလံ.

၄၀. ‘‘ပဉ္စပညာသိတော ကပ္ပေ၊ ဧကော အာသိံ သမောဂဓော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၄၁. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ တရဏီယော ထေရော ဣမာ ဂါထာယော အဘာသိတ္ထာတိ.

တရဏီယတ္ထေရဿာပဒါနံ ဒသမံ.

သုဝဏ္ဏဗိဗ္ဗောဟနဝဂ္ဂေါ အဋ္ဌဝီသတိမော.