၁. သုဝဏ္ဏဗိဗ္ဗောဟနိယတ္ထေရအပဒါနံ

၁. ‘‘ဧကာသနံ အဟမဒံ၊ ပသန္နော သေဟိ ပါဏိဘိ၊

ဗိဗ္ဗောဟနဉ္စ [ဗိမ္ဗောဟနဉ္စ (သီ. ပီ.)] ပါဒါသိံ၊ ဥတ္တမတ္ထဿ ပတ္တိယာ.

၂. ‘‘ဧကနဝုတိတော ကပ္ပေ၊ ဗိဗ္ဗောဟနမဒါသဟံ၊

ဒုဂ္ဂတိံ နာဘိဇာနာမိ၊ ဗိဗ္ဗောဟနဿိဒံ ဖလံ.

၃. ‘‘ဣတော တေသဋ္ဌိမေ ကပ္ပေ၊ အသမော နာမ ခတ္တိယော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၄. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သုဝဏ္ဏဗိဗ္ဗောဟနိယော ထေရော ဣမာ ဂါထာယော အဘာသိတ္ထာတိ.

သုဝဏ္ဏဗိဗ္ဗောဟနိယတ္ထေရဿာပဒါနံ ပဌမံ.