၇. ဇဝဟံသကတ္ထေရအပဒါနံ

၂၆. ‘‘စန္ဒဘာဂါနဒီတီရေ၊ အာသိံ ဝနစရော တဒါ၊

သိဒ္ဓတ္ထံ အဒ္ဒသံ ဗုဒ္ဓံ၊ ဂစ္ဆန္တံ အနိလဉ္ဇသေ.

၂၇. ‘‘အဉ္ဇလိံ ပဂ္ဂဟေတွာန၊ ဥလ္လောကေန္တော မဟာမုနိံ၊

သကံ စိတ္တံ ပသာဒေတွာ၊ အဝန္ဒိံ နာယကံ အဟံ.

၂၈. ‘‘စတုန္နဝုတိတော ကပ္ပေ၊ ယမဝန္ဒိံ နရာသဘံ၊

ဒုဂ္ဂတိံ နာဘိဇာနာမိ၊ ဝန္ဒနာယ ဣဒံ ဖလံ.

၂၉. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဇဝဟံသကော ထေရော ဣမာ ဂါထာယော အဘာသိတ္ထာတိ.

ဇဝဟံသကတ္ထေရဿာပဒါနံ သတ္တမံ.