၄. တိစမ္ပကပုပ္ဖိယတ္ထေရအပဒါနံ

၁၃. ‘‘ဟိမဝန္တဿာဝိဒူရေ၊ ဝိကတော [ဝိကနော (သီ. သျာ.)] နာမ ပဗ္ဗတော၊

တဿ ဝေမဇ္ဈေ ဝသတိ၊ သမဏော ဘာဝိတိန္ဒြိယော.

၁၄. ‘‘ဒိသွာန တဿောပသမံ၊ ဝိပ္ပသန္နေန စေတသာ၊

တီဏိ စမ္ပကပုပ္ဖါနိ၊ ဂဟေတွာန သမောကိရိံ.

၁၅. ‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၁၆. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ တိစမ္ပကပုပ္ဖိယော ထေရော ဣမာ ဂါထာယော အဘာသိတ္ထာတိ.

တိစမ္ပကပုပ္ဖိယတ္ထေရဿာပဒါနံ စတုတ္ထံ.