၂. မိနေလပုပ္ဖိယတ္ထေရအပဒါနံ

၅. ‘‘သုဝဏ္ဏဝဏ္ဏော ဘဂဝါ၊ သတရံသီ ပတာပဝါ၊

စင်္ကမနံ သမာရူဠှော၊ မေတ္တစိတ္တော သိခီသဘော.

၆. ‘‘ပသန္နစိတ္တော သုမနော၊ ဝန္ဒိတွာ [ထောမေတွာ (သျာ.)] ဉာဏမုတ္တမံ၊

မိနေလပုပ္ဖံ ပဂ္ဂယှ၊ ဗုဒ္ဓဿ အဘိရောပယိံ.

၇. ‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၈. ‘‘ဧကူနတိံသကပ္ပမှိ၊ သုမေဃဃနနာမကော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၉. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ မိနေလပုပ္ဖိယော ထေရော ဣမာ ဂါထာယော အဘာသိတ္ထာတိ.

မိနေလပုပ္ဖိယတ္ထေရဿာပဒါနံ ဒုတိယံ.