၁. ကုဋဇပုပ္ဖိယတ္ထေရအပဒါနံ

၁. ‘‘သုဝဏ္ဏဝဏ္ဏံ သမ္ဗုဒ္ဓံ၊ သတရံသိံဝ ဥဂ္ဂတံ၊

ဒိသံ အနုဝိလောကေန္တံ၊ ဂစ္ဆန္တံ အနိလဉ္ဇသေ.

၂. ‘‘ကုဋဇံ ပုပ္ဖိတံ ဒိသွာ၊ သံဝိတ္ထတသမောတ္ထတံ၊

ရုက္ခတော ဩစိနိတွာန၊ ဖုဿဿ အဘိရောပယိံ.

၃. ‘‘ဒွေနဝုတေ ဣတော ကပ္ပေ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၄. ‘‘ဣတော သတ္တရသေ ကပ္ပေ၊ တယော အာသုံ သုပုပ္ဖိတာ၊

သတ္တရတနသမ္ပန္နာ၊ စက္ကဝတ္တီ မဟဗ္ဗလာ.

၅. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ကုဋဇပုပ္ဖိယော ထေရော ဣမာ ဂါထာယော အဘာသိတ္ထာတိ.

ကုဋဇပုပ္ဖိယတ္ထေရဿာပဒါနံ ပဌမံ.