၃. ရတ္တိပုပ္ဖိယတ္ထေရအပဒါနံ

၁၃. ‘‘မိဂလုဒ္ဒေါ ပုရေ အာသိံ၊ အရညေ ကာနနေ အဟံ၊

ဝိပဿိံ အဒ္ဒသံ ဗုဒ္ဓံ၊ ဒေဝဒေဝံ နရာသဘံ.

၁၄. ‘‘ရတ္တိကံ ပုပ္ဖိတံ ဒိသွာ၊ ကုဋဇံ ဓရဏီရုဟံ၊

သမူလံ ပဂ္ဂဟေတွာန၊ ဥပနေသိံ မဟေသိနော.

၁၅. ‘‘ဧကနဝုတိတော ကပ္ပေ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ပုပ္ဖဒါနဿိဒံ ဖလံ.

၁၆. ‘‘ဣတော စ အဋ္ဌမေ ကပ္ပေ၊ သုပ္ပသန္နသနာမကော၊

သတ္တရတနသမ္ပန္နော၊ ရာဇာဟောသိံ မဟဗ္ဗလော.

၁၇. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ရတ္တိပုပ္ဖိယော ထေရော ဣမာ ဂါထာယော အဘာသိတ္ထာတိ.

ရတ္တိပုပ္ဖိယတ္ထေရဿာပဒါနံ တတိယံ.