၈. နာဂပုပ္ဖိယတ္ထေရအပဒါနံ

၃၉. ‘‘သုဝစ္ဆော နာမ နာမေန၊ ဗြာဟ္မဏော မန္တပါရဂူ၊

ပုရက္ခတော သသိဿေဟိ၊ ဝသတေ ပဗ္ဗတန္တရေ.

၄၀. ‘‘ပဒုမုတ္တရော နာမ ဇိနော၊ အာဟုတီနံ ပဋိဂ္ဂဟော၊

မမုဒ္ဓရိတုကာမော သော၊ အာဂစ္ဆိ မမ သန္တိကံ.

၄၁. ‘‘ဝေဟာသမှိ စင်္ကမတိ၊ ဓူပါယတိ ဇလတေ တထာ၊

ဟာသံ မမံ ဝိဒိတွာန၊ ပက္ကာမိ ပါစိနာမုခေါ.

၄၂. ‘‘တဉ္စ အစ္ဆရိယံ ဒိသွာ၊ အဗ္ဘုတံ လောမဟံသနံ၊

နာဂပုပ္ဖံ ဂဟေတွာန၊ ဂတမဂ္ဂမှိ ဩကိရိံ.

၄၃. ‘‘သတသဟဿိတော ကပ္ပေ၊ ယံ ပုပ္ဖံ ဩကိရိံ အဟံ၊

တေန စိတ္တပ္ပသာဒေန၊ ဒုဂ္ဂတိံ နုပပဇ္ဇဟံ.

၄၄. ‘‘ဧကတ္တိံသေ ကပ္ပသတေ [ဧကတိံသေ ဣတော ကမ္မေ (သျာ.)]၊ ရာဇာ အာသိ မဟာရဟော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၄၅. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ နာဂပုပ္ဖိယော ထေရော ဣမာ ဂါထာယော အဘာသိတ္ထာတိ.

နာဂပုပ္ဖိယတ္ထေရဿာပဒါနံ အဋ္ဌမံ.