၅. မန္ဒာရဝပုပ္ဖပူဇကတ္ထေရအပဒါနံ
၂၅. ‘‘ဒေဝပုတ္တော အဟံ သန္တော၊ ပူဇယိံ သိခိနာယကံ၊
မန္ဒာရဝေန ပုပ္ဖေန၊ ဗုဒ္ဓဿ အဘိရောပယိံ.
၂၆. ‘‘သတ္တာဟံ ဆဒနံ အာသိ၊ ဒိဗ္ဗံ မာလံ တထာဂတေ၊
သဗ္ဗေ ဇနာ သမာဂန္တွာ၊ နမဿိံသု တထာဂတံ.
၂၇. ‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိပူဇယိံ၊
ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.
၂၈. ‘‘ဣတော စ ဒသမေ ကပ္ပေ၊ ရာဇာဟောသိံ ဇုတိန္ဓရော၊
သတ္တရတနသမ္ပန္နော၊ စက္ကဝတ္တီ မဟဗ္ဗလော.
၂၉. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.
ဣတ္ထံ သုဒံ အာယသ္မာ မန္ဒာရဝပုပ္ဖပူဇကော ထေရော ဣမာ ဂါထာယော အဘာသိတ္ထာတိ.
မန္ဒာရဝပုပ္ဖပူဇကတ္ထေရဿာပဒါနံ ပဉ္စမံ.