၃. ဝီထိသမ္မဇ္ဇကတ္ထေရအပဒါနံ

၁၅. ‘‘ဥဒေန္တံ သတရံသိံဝ၊ ပီတရံသိံဝ [သိတရံသိံဝ (သီ. သျာ.)] ဘာဏုမံ၊

ပန္နရသေ ယထာ စန္ဒံ၊ နိယျန္တံ လောကနာယကံ.

၁၆. ‘‘အဋ္ဌသဋ္ဌိသဟဿာနိ၊ သဗ္ဗေ ခီဏာသဝါ အဟုံ၊

ပရိဝါရိံသု သမ္ဗုဒ္ဓံ၊ ဒွိပဒိန္ဒံ နရာသဘံ.

၁၇. ‘‘သမ္မဇ္ဇိတွာန တံ ဝီထိံ၊ နိယျန္တေ လောကနာယကေ၊

ဥဿာပေသိံ ဓဇံ တတ္ထ၊ ဝိပ္ပသန္နေန စေတသာ.

၁၈. ‘‘ဧကနဝုတိတော ကပ္ပေ၊ ယံ ဓဇံ အဘိရောပယိံ၊

ဒုဂ္ဂတိံ နာဘိဇာနာမိ၊ ဓဇဒါနဿိဒံ ဖလံ.

၁၉. ‘‘ဣတော စတုတ္ထကေ ကပ္ပေ၊ ရာဇာဟောသိံ မဟဗ္ဗလော၊

သဗ္ဗာကာရေန သမ္ပန္နော၊ သုဓဇော ဣတိ ဝိဿုတော.

၂၀. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဝီထိသမ္မဇ္ဇကော ထေရော ဣမာ ဂါထာယော အဘာသိတ္ထာတိ.

ဝီထိသမ္မဇ္ဇကတ္ထေရဿာပဒါနံ တတိယံ.