၂. သုဒဿနတ္ထေရအပဒါနံ

၁၀. ‘‘ဝိနတာ နဒိယာ [ဝိတ္ထတာယ နဒိယာ (သျာ.)] တီရေ၊ ပိလက္ခု [ပိလက္ခော (သီ. ထေရဂါထာ အဋ္ဌ.)] ဖလိတော အဟု၊

တာဟံ ရုက္ခံ ဂဝေသန္တော၊ အဒ္ဒသံ လောကနာယကံ.

၁၁. ‘‘ကေတကံ ပုပ္ဖိတံ ဒိသွာ၊ ဝဏ္ဋေ ဆေတွာနဟံ တဒါ၊

ဗုဒ္ဓဿ အဘိရောပေသိံ၊ သိခိနော လောကဗန္ဓုနော.

၁၂. ‘‘ယေန ဉာဏေန ပတ္တောသိ၊ အစ္စုတံ အမတံ ပဒံ၊

တံ ဉာဏံ အဘိပူဇေမိ၊ ဗုဒ္ဓသေဋ္ဌ မဟာမုနိ.

၁၃. ‘‘ဉာဏမှိ ပူဇံ ကတွာန၊ ပိလက္ခုမဒ္ဒသံ အဟံ၊

ပဋိလဒ္ဓေါမှိ တံ ပညံ [တံ သညံ (သျာ.)၊ တံ ပုညံ (က.)]၊ ဉာဏပူဇာယိဒံ ဖလံ.

၁၄. ‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ဉာဏပူဇာယိဒံ ဖလံ.

၁၅. ‘‘ဣတော တေရသကပ္ပမှိ၊ ဒွါဒသာသုံ ဖလုဂ္ဂတာ၊

သတ္တရတနသမ္ပန္နာ၊ စက္ကဝတ္တီ မဟပ္ဖလာ.

၁၆. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သုဒဿနော ထေရော ဣမာ ဂါထာယော အဘာသိတ္ထာတိ.

သုဒဿနတ္ထေရဿာပဒါနံ ဒုတိယံ.