၉. ဂဏ္ဌိပုပ္ဖိယတ္ထေရအပဒါနံ

၉၁. ‘‘သုဝဏ္ဏဝဏ္ဏော သမ္ဗုဒ္ဓေါ၊ ဝိပဿီ ဒက္ခိဏာရဟော၊

ပုရက္ခတော သာဝကေဟိ၊ အာရာမာ အဘိနိက္ခမိ.

၉၂. ‘‘ဒိသွာနဟံ ဗုဒ္ဓသေဋ္ဌံ၊ သဗ္ဗညုံ တမနာသကံ၊

ပသန္နစိတ္တော သုမနော၊ ဂဏ္ဌိပုပ္ဖံ [ဂတမဂ္ဂံ (သျာ. က.)] အပူဇယိံ.

၉၃. ‘‘တေန စိတ္တပ္ပသာဒေန၊ ဒွိပဒိန္ဒဿ တာဒိနော၊

ဟဋ္ဌော ဟဋ္ဌေန စိတ္တေန၊ ပုန ဝန္ဒိံ တထာဂတံ.

၉၄. ‘‘ဧကနဝုတိတော ကပ္ပေ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၉၅. ‘‘ဧကတာလီသိတော ကပ္ပေ၊ စရဏော နာမ ခတ္တိယော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၉၆. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဂဏ္ဌိပုပ္ဖိယော [ဂန္ဓပုပ္ဖိယော (သျာ. က.)] ထေရော ဣမာ ဂါထာယော အဘာသိတ္ထာတိ.

ဂဏ္ဌိပုပ္ဖိယတ္ထေရဿာပဒါနံ နဝမံ.