၄. ဧကာသနိယတ္ထေရအပဒါနံ

၃၁. ‘‘ဝရုဏော နာမ နာမေန၊ ဒေဝရာဇာ အဟံ တဒါ၊

ဥပဋ္ဌဟေသိံ သမ္ဗုဒ္ဓံ၊ သယောဂ္ဂဗလဝါဟနော.

၃၂. ‘‘နိဗ္ဗုတေ လောကနာထမှိ၊ အတ္ထဒဿီနရုတ္တမေ၊

တူရိယံ သဗ္ဗမာဒါယ၊ အဂမံ ဗောဓိမုတ္တမံ.

၃၃. ‘‘ဝါဒိတေန စ နစ္စေန၊ သမ္မတာဠသမာဟိတော၊

သမ္မုခါ ဝိယ သမ္ဗုဒ္ဓံ၊ ဥပဋ္ဌိံ ဗောဓိမုတ္တမံ.

၃၄. ‘‘ဥပဋ္ဌဟိတွာ တံ ဗောဓိံ၊ ဓရဏီရုဟပါဒပံ၊

ပလ္လင်္ကံ အာဘုဇိတွာန၊ တတ္ထ ကာလင်္ကတော အဟံ.

၃၅. ‘‘သကကမ္မာဘိရဒ္ဓေါဟံ၊ ပသန္နော ဗောဓိမုတ္တမေ၊

တေန စိတ္တပ္ပသာဒေန၊ နိမ္မာနံ ဥပပဇ္ဇဟံ.

၃၆. ‘‘သဋ္ဌိတူရိယသဟဿာနိ၊ ပရိဝါရေန္တိ မံ သဒါ၊

မနုဿေသု စ ဒေဝေသု၊ ဝတ္တမာနံ ဘဝါဘဝေ.

၃၇. ‘‘တိဝိဓဂ္ဂီ နိဗ္ဗုတာ မယှံ၊ ဘဝါ သဗ္ဗေ သမူဟတာ၊

ဓာရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ [အယဉ္စ ဂါထာ ပဋိသမ္ဘိဒါ စတဿေတိဂါထာယ ဧကသမ္ဗန္ဓာ ဘဝိတံ ယုတ္တာ].

၃၈. ‘‘သုဗာဟူ နာမ နာမေန၊ စတုတ္တိံသာသု ခတ္တိယာ၊

သတ္တရတနသမ္ပန္နာ၊ ပဉ္စကပ္ပသတေ ဣတော.

၃၉. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဧကာသနိယော ထေရော ဣမာ ဂါထာယော အဘာသိတ္ထာတိ.

ဧကာသနိယတ္ထေရဿာပဒါနံ စတုတ္ထံ.