၆. တိပုပ္ဖိယတ္ထေရအပဒါနံ

၃၁. ‘‘မိဂလုဒ္ဒေါ ပုရေ အာသိံ၊ အရညေ ကာနနေ အဟံ [ဗြဟာ (သျာ.)]၊

ပါဋလိံ ဟရိတံ ဒိသွာ၊ တီဏိ ပုပ္ဖါနိ ဩကိရိံ.

၃၂. ‘‘ပတိတပတ္တာနိ [သတ္တပတ္တာနိ (သီ.)၊ သတပတ္တာနိ (က.)၊ သုက္ခပဏ္ဏာနိ (သျာ.)] ဂဏှိတွာ၊ ဗဟိ ဆဍ္ဍေသဟံ တဒါ၊

အန္တောသုဒ္ဓံ ဗဟိသုဒ္ဓံ၊ သုဝိမုတ္တံ အနာသဝံ.

၃၃. ‘‘သမ္မုခါ ဝိယ သမ္ဗုဒ္ဓံ၊ ဝိပဿိံ လောကနာယကံ၊

ပါဋလိံ အဘိဝါဒေတွာ၊ တတ္ထ ကာလင်္ကတော အဟံ.

၃၄. ‘‘ဧကနဝုတိတော ကပ္ပေ၊ ယံ ဗောဓိမဘိပူဇယိံ၊

ဒုဂ္ဂတိံ နာဘိဇာနာမိ၊ ဗောဓိပူဇာယိဒံ ဖလံ.

၃၅. ‘‘သမန္တပါသာဒိကာ နာမ၊ တေရသာသိံသု ရာဇိနော၊

ဣတော တေတ္တိံသကပ္ပမှိ [တိံသတိကပ္ပမှိ (သျာ.)]၊ စက္ကဝတ္တီ မဟဗ္ဗလာ.

၃၆. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ တိပုပ္ဖိယော ထေရော ဣမာ ဂါထာယော အဘာသိတ္ထာတိ.

တိပုပ္ဖိယတ္ထေရဿာပဒါနံ ဆဋ္ဌံ.