၃-၅. ပုဏ္ဏမန္တာဏိပုတ္တတ္ထေရအပဒါနံ

၄၃၄. ‘‘အဇ္ဈာယကော မန္တဓရော၊ တိဏ္ဏံ ဝေဒါန ပါရဂူ၊

ပုရက္ခတောမှိ သိဿေဟိ၊ ဥပဂစ္ဆိံ နရုတ္တမံ.

၄၃၅. ‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော၊

မမ ကမ္မံ ပကိတ္တေသိ၊ သင်္ခိတ္တေန မဟာမုနိ.

၄၃၆. ‘‘တာဟံ ဓမ္မံ သုဏိတွာန၊ အဘိဝါဒေတွာန သတ္ထုနော၊

အဉ္ဇလိံ ပဂ္ဂဟေတွာန၊ ပက္ကမိံ [ပက္ကာမိံ (သီ. သျာ.)] ဒက္ခိဏာမုခေါ.

၄၃၇. ‘‘သင်္ခိတ္တေန သုဏိတွာန၊ ဝိတ္ထာရေန အဘာသယိံ [အဒေသယိံ (သီ. သျာ.)]၊

သဗ္ဗေ သိဿာ အတ္တမနာ၊ သုတွာန မမ ဘာသတော၊

သကံ ဒိဋ္ဌိံ ဝိနောဒေတွာ၊ ဗုဒ္ဓေ စိတ္တံ ပသာဒယုံ.

၄၃၈. ‘‘သင်္ခိတ္တေနပိ ဒေသေမိ၊ ဝိတ္ထာရေန တထေဝဟံ [ဒေသေသိံ ဝိတ္ထာရေနပိ ဘာသယိံ (က.)]၊

အဘိဓမ္မနယညူဟံ၊ ကထာဝတ္ထုဝိသုဒ္ဓိယာ၊

သဗ္ဗေသံ ဝိညာပေတွာန၊ ဝိဟရာမိ အနာသဝေါ.

၄၃၉. ‘‘ဣတော ပဉ္စသတေ ကပ္ပေ၊ စတုရော သုပ္ပကာသကာ၊

သတ္တရတနသမ္ပန္နာ၊ စတုဒီပမှိ ဣဿရာ.

၄၄၀. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပုဏ္ဏော မန္တာဏိပုတ္တော ထေရော ဣမာ ဂါထာယော အဘာသိတ္ထာတိ.

ပုဏ္ဏမန္တာဏိပုတ္တတ္ထေရဿာပဒါနံ ပဉ္စမံ.