၇. ပဌမအာမကဓညပေယျာလဝဂ္ဂေါ

၃. ပညာသုတ္တဝဏ္ဏနာ

၁၁၃၃. အာမကဓညပေယျာလေ အရိယေန ပညာစက္ခုနာတိ ဝိပဿနံ အာဒိံ ကတွာ လောကိယလောကုတ္တရေန ဉာဏစက္ခုနာ.

၄. သုရာမေရယသုတ္တဝဏ္ဏနာ

၁၁၃၄. သုရာမေရယမဇ္ဇပ္ပမာဒဋ္ဌာနာ ပဋိဝိရတာတိ ဧတ္ထ သုရာ နာမ ပိဋ္ဌသုရာ၊ ဩဒနသုရာ၊ ပူဝသုရာ၊ ကိဏ္ဏပက္ခိတ္တာ၊ သမ္ဘာရသံယုတ္တာတိ ပဉ္စဝိဓာ. မေရယံ နာမ ပုပ္ဖါသဝေါ၊ ဖလာသဝေါတိ၊ ဧဝံ ဝုတ္တော ယော ကောစိ အာသဝေါ. မဇ္ဇန္တိ တဒေဝ ဥဘယံ၊ ယံ ဝါ ပနညမ္ပိ သုရာသဝဝိနိမုတ္တံ မဒနီယံ. ယာယ စေတနာယ တံ ပိဝန္တိ၊ သာ ပမာဒဿ ကာရဏတ္တာ ပမာဒဋ္ဌာနံ နာမ၊ တတော ပဋိဝိရတာတိ အတ္ထော.

၆-၇. မတ္တေယျသုတ္တာဒိဝဏ္ဏနာ

၁၁၃၆-၃၇. မတ္တေယျာတိ မာတုဟိတာ၊ မာတရိ သမ္မာပဋိပန္နာတိ အတ္ထော. ပေတ္တေယျာဒီသု ပိတုဟိတာ ပေတ္တေယျာ.

၈-၉. သာမညသုတ္တာဒိဝဏ္ဏနာ

၁၁၃၈-၃၉. သမဏာနံ ဟိတာ သာမညာ. ဗြာဟ္မဏာနံ ဟိတာ ဗြဟ္မညာ. တေသု တေသု သမ္မာ ပဋိပန္နာနံယေဝေတံ အဓိဝစနံ.

၁၀. ပစာယိကသုတ္တဝဏ္ဏနာ

၁၁၄၀. ကုလေ ဇေဋ္ဌာပစာယိနောတိ ကုလေ ဇေဋ္ဌာနံ အပစာယိနော၊ နီစဝုတ္တိနောတိ အတ္ထော.