၄. သီသပါဝနဝဂ္ဂေါ

၁. သီသပါဝနသုတ္တဝဏ္ဏနာ

၁၁၀၁. စတုတ္ထဿ ပဌမေ ယဒိဒံ ဥပရီတိ ယာနိ ဣမာနိ ဥပရိ. သီသပါဝနေတိ သီသပါရုက္ခေ.

၂. ခဒိရပတ္တသုတ္တဝဏ္ဏနာ

၁၁၀၂. ဒုတိယေ အနဘိသမေစ္စာတိ ဉာဏေန အနဘိသမာဂန္တွာ၊ အပ္ပဋိဝိဇ္ဈိတွာတိ အတ္ထော.

၃. ဒဏ္ဍသုတ္တဝဏ္ဏနာ

၁၁၀၃. တတိယေ အသ္မာ လောကာ ပရံ လောကန္တိ ဣမမှာ မနုဿလောကာ ပရံ နိရယမ္ပိ၊ တိရစ္ဆာနယောနိမ္ပိ၊ ပေတ္တိဝိသယမ္ပိ၊ မနုဿလောကမ္ပိ၊ ဒေဝလောကမ္ပိ၊ ဂစ္ဆန္တိ၊ ပုနပ္ပုနံ ဝဋ္ဋသ္မိံယေဝ နိဗ္ဗတ္တန္တီတိ အတ္ထော.

၅. သတ္တိသတသုတ္တဝဏ္ဏနာ

၁၁၀၅. ပဉ္စမေ ဧဝဉ္စေတံ၊ ဘိက္ခဝေ၊ အဿာတိ၊ ဘိက္ခဝေ၊ ဧဝံ စေ ဧတံ ဘဝေယျ၊ နိရန္တရံ သတ္တိသတေဟိ ဟညမာနဿ ဒုက္ခဒေါမနဿေဟိ သဟေဝေသ သစ္စာဘိသမယော ဘဝေယျ စေတိ အတ္ထော.

၉. ဣန္ဒခီလသုတ္တဝဏ္ဏနာ

၁၁၀၉. နဝမေ မုခံ ဩလောကေန္တီတိ အဇ္ဈာသယံ ဩလောကေန္တိ. အဇ္ဈာသယော ဣဓ မုခန္တိ အဓိပ္ပေတော.

၁၀. ဝါဒတ္ထိကသုတ္တဝဏ္ဏနာ

၁၁၁၀. ဒသမေ သိလာယူပေါတိ သိလာထမ္ဘော. သောဠသကုက္ကုကောတိ သောဠသဟတ္ထော. သောဠသကုက္ကူတိပိ ပါဌော. ဟေဋ္ဌာ နေမင်္ဂမာတိ ဟေဋ္ဌာ အာဝါဋံ ပဝိဋ္ဌာ. အဋ္ဌ ကုက္ကု ဥပရိနေမဿာတိ အဋ္ဌ ဟတ္ထာ အာဝါဋဿ ဥပရိ ဥဂ္ဂန္တွာ ဌိတာ ဘဝေယျုံ. ဘုသာတိ ဗလဝတီ. သေသံ သဗ္ဗတ္ထ ဥတ္တာနမေဝါတိ.

သီသပါဝနဝဂ္ဂေါ စတုတ္ထော.