၇. နာဂဒတ္တသုတ္တဝဏ္ဏနာ

၂၂၇. သတ္တမေ အတိကာလေနာတိ သဗ္ဗရတ္တိံ နိဒ္ဒါယိတွာ ဗလဝပစ္စူသေ ကောဋိသမ္မုဉ္ဇနိယာ ထောကံ သမ္မဇ္ဇိတွာ မုခံ ဓောဝိတွာ ယာဂုဘိက္ခာယ ပါတောဝ ပဝိသတိ. အတိဒိဝါတိ ယာဂုံ အာဒါယ အာသနသာလံ ဂန္တွာ ပိဝိတွာ ဧကသ္မိံ ဌာနေ နိပန္နော နိဒ္ဒါယိတွာ – ‘‘မနုဿာနံ ဘောဇနဝေလာယ ပဏီတံ ဘိက္ခံ လဘိဿာမီ’’တိ ဥပကဋ္ဌေ မဇ္ဈနှိကေ ဥဋ္ဌာယ ဓမ္မကရဏေန ဥဒကံ ဂဟေတွာ အက္ခီနိ ပမဇ္ဇိတွာ ပိဏ္ဍာယ စရိတွာ ယာဝဒတ္ထံ ဘုဉ္ဇိတွာ မဇ္ဈနှိကေ ဝီတိဝတ္တေ ပဋိက္ကမတိ. ဒိဝါ စ အာဂန္တွာတိ အတိကာလေ ပဝိဋ္ဌေန နာမ အညေဟိ ဘိက္ခူဟိ ပဌမတရံ အာဂန္တဗ္ဗံ ဟောတိ၊ တွံ ပန အတိဝိယ ဒိဝါ အာဂန္တွာ ဂတာသီတိ အတ္ထော. ဘာယာမိ နာဂဒတ္တန္တိ တံ နာဂဒတ္တံ အဟံ ဘာယာမိ. သုပ္ပဂဗ္ဘန္တိ သုဋ္ဌု ပဂဗ္ဘံ. ကုလေသူတိ ခတ္တိယကုလာဒိဥပဋ္ဌာကကုလေသု. သတ္တမံ.