၄. သမ္ဗဟုလသုတ္တဝဏ္ဏနာ

၂၂၄. စတုတ္ထေ သမ္ဗဟုလာတိ ဗဟူ သုတ္တန္တိကာ အာဘိဓမ္မိကာ ဝိနယဓရာ စ. ဝိဟရန္တီတိ သတ္ထု သန္တိကေ ကမ္မဋ္ဌာနံ ဂဟေတွာ ဝိဟရန္တိ. ပက္ကမိံသူတိ တေ ကိရ တသ္မိံ ဇနပဒေ အညတရံ ဂါမံ ဥပသင်္ကမန္တေ ဒိသွာ မနုဿာ ပသန္နစိတ္တာ အာသနသာလာယ ကောဇဝတ္ထရဏာဒီနိ ပညာပေတွာ ယာဂုခဇ္ဇကာနိ ဒတွာ ဥပနိသီဒိံသု. မဟာထေရော ဧကံ ဓမ္မကထိကံ ‘‘ဓမ္မံ ကထေဟီ’’တိ အာဟ. သော စိတ္တံ ဓမ္မကထံ ကထေသိ. မနုဿာ ပသီဒိတွာ ဘောဇနဝေလာယံ ပဏီတဘောဇနံ အဒံသု. မဟာထေရော မနုညံ ဘတ္တာနုမောဒနမကာသိ. မနုဿာ ဘိယျောသောမတ္တာယ ပသန္နာ ‘‘ဣဓေဝ၊ ဘန္တေ၊ တေမာသံ ဝသထာ’’တိ ပဋိညံ ကာရေတွာ ဂမနာဂမနသမ္ပန္နေ ဌာနေ သေနာသနာနိ ကာရေတွာ စတူဟိ ပစ္စယေဟိ ဥပဋ္ဌဟိံသု. မဟာထေရော ဝဿူပနာယိကဒိဝသေ ဘိက္ခူ ဩဝဒိ – ‘‘အာဝုသော၊ တုမှေဟိ ဂရုကဿ သတ္ထု သန္တိကေ ကမ္မဋ္ဌာနံ ဂဟိတံ၊ ဗုဒ္ဓပါတုဘာဝေါ နာမ ဒုလ္လဘော. မာသဿ အဋ္ဌ ဒိဝသေ ဓမ္မဿဝနံ ကတွာ ဂဏသင်္ဂဏိကံ ပဟာယ အပ္ပမတ္တာ ဝိဟရထာ’’တိ. တေ တတော ပဋ္ဌာယ ယုဉ္ဇန္တိ ဃဋေန္တိ. ကဒါစိ သဗ္ဗရတ္တိကံ ဓမ္မဿဝနံ ကရောန္တိ၊ ကဒါစိ ပဉှံ ဝိဿဇ္ဇေန္တိ၊ ကဒါစိ ပဓာနံ ကရောန္တိ. တေသံ ဓမ္မဿဝနဒိဝသေ ဓမ္မံ ကထေန္တာနံယေဝ အရုဏော ဥဂ္ဂစ္ဆတိ. ပဉှာဝိဿဇ္ဇနဒိဝသေ ဗျတ္တော ဘိက္ခု ပဉှံ ပုစ္ဆတိ၊ ပဏ္ဍိတော ဝိဿဇ္ဇေတီတိ ပုစ္ဆနဝိဿဇ္ဇနံ ကရောန္တာနံယေဝ. ပဓာနဒိဝသေ သူရိယတ္ထင်္ဂမနေ ဂဏ္ဍိံ ပဟရိတွာဝ စင်္ကမံ ဩတရိတွာ ပဓာနံ ကရောန္တာနံယေဝ. တေ ဧဝံ ဝဿံ ဝဿိတွာ ပဝါရေတွာ ပက္ကမိံသု. တံ သန္ဓာယေတံ ဝုတ္တံ. ပရိဒေဝမာနာတိ ‘‘ဣဒါနိ တထာရူပံ မဓုရံ ဓမ္မဿဝနံ ပဉှာကထနံ ကုတော လဘိဿာမီ’’တိအာဒီနိ ဝတွာ ရောဒမာနာ.

ခါယတီတိ ပညာယတိ ဥပဋ္ဌာတိ. ကော မေတိ ကဟံ ဣမေ. ဝဇ္ဇိဘူမိယာတိ ဝဇ္ဇိရဋ္ဌာဘိမုခါ ဂတာ. မဂါ ဝိယာတိ ယထာ မဂါ တသ္မိံ တသ္မိံ ပဗ္ဗတပါဒေ ဝါ ဝနသဏ္ဍေ ဝါ ဝိစရန္တာ – ‘‘ဣဒံ အမှာကံ မာတုသန္တကံ ပိတုသန္တကံ ပဝေဏိအာဂတ’’န္တိ အဂဟေတွာ၊ ယတ္ထေဝ နေသံ ဂေါစရဖာသုတာ စ ဟောတိ ပရိပန္ထာဘာဝေါ စ၊ တတ္ထ ဝိစရန္တိ. ဧဝံ အနိကေတာ အဂေဟာ ဘိက္ခဝေါပိ ‘‘အယံ၊ အာဝုသော၊ အမှာကံ အာစရိယုပဇ္ဈာယာနံ သန္တကော ပဝေဏိအာဂတော’’တိ အဂဟေတွာ ယတ္ထေဝ နေသံ ဥတုသပ္ပါယံ ဘောဇနသပ္ပါယံ ပုဂ္ဂလသပ္ပါယံ သေနာသနသပ္ပါယံ ဓမ္မဿဝနသပ္ပါယဉ္စ သုလဘံ ဟောတိ၊ တတ္ထ ဝိဟရန္တိ. စတုတ္ထံ.