၁. ဝိဝေကသုတ္တဝဏ္ဏနာ

၂၂၁. ဝနသံယုတ္တဿ ပဌမေ ကောသလေသု ဝိဟရတီတိ သတ္ထု သန္တိကေ ကမ္မဋ္ဌာနံ ဂဟေတွာ တဿ ဇနပဒဿ သုလဘဘိက္ခတာယ တတ္ထ ဂန္တွာ ဝိဟရတိ. သံဝေဇေတုကာမာတိ ဝိဝေကံ ပဋိပဇ္ဇာပေတုကာမာ. ဝိဝေကကာမောတိ တယော ဝိဝေကေ ပတ္ထယန္တော. နိစ္ဆရတီ ဗဟိဒ္ဓါတိ ဗာဟိရေသု ပုထုတ္တာရမ္မဏေသု စရတိ. ဇနော ဇနသ္မိန္တိ တွံ ဇနော အညသ္မိံ ဇနေ ဆန္ဒရာဂံ ဝိနယဿု. ပဇဟာသီတိ ပဇဟ. ဘဝါသီတိ ဘဝ. သတံ တံ သာရယာမသေတိ သတိမန္တံ ပဏ္ဍိတံ တံ မယမ္ပိ သာရယာမ၊ သတံ ဝါ ဓမ္မံ မယံ တံ သာရယာမာတိ အတ္ထော. ပါတာလရဇောတိ အပ္ပတိဋ္ဌဋ္ဌေန ပါတာလသင်္ခါတော ကိလေသရဇော. မာ တံ ကာမရဇောတိ အယံ ကာမရာဂရဇော တံ မာ အဝဟရိ၊ အပါယမေဝ မာ နေတူတိ အတ္ထော. ပံသုကုန္ထိတောတိ ပံသုမက္ခိတော. ဝိဓုနန္တိ ဝိဓုနန္တော. သိတံ ရဇန္တိ သရီရလဂ္ဂံ ရဇံ. သံဝေဂမာပါဒီတိ ဒေဝတာပိ နာမ မံ ဧဝံ သာရေတီတိ ဝိဝေကမာပန္နော၊ ဥတ္တမဝီရိယံ ဝါ ပဂ္ဂယှ ပရမဝိဝေကံ မဂ္ဂမေဝ ပဋိပန္နောတိ. ပဌမံ.