၃. ပေသလသုတ္တဝဏ္ဏနာ

၂၁၁. တတိယေ အတိမညတီတိ ‘‘ကိံ ဣမေ မဟလ္လကာ? န ဧတေသံ ပါဠိ၊ န အဋ္ဌကထာ၊ န ပဒဗျဉ္ဇနမဓုရတာ၊ အမှာကံ ပန ပါဠိပိ အဋ္ဌကထာပိ နယသတေန နယသဟဿေန ဥပဋ္ဌာတီ’’တိ အတိက္ကမိတွာ မညတိ. ဂေါတမာတိ ဂေါတမဗုဒ္ဓသာဝကတ္တာ အတ္တာနံ အာလပတိ. မာနပထန္တိ မာနာရမ္မဏဉ္စေဝ မာနသဟဘုနော စ ဓမ္မေ. ဝိပ္ပဋိသာရီဟုဝါတိ ဝိပ္ပဋိသာရီ အဟုဝါ၊ အဟောသီတိ အတ္ထော. မဂ္ဂဇိနောတိ မဂ္ဂေန ဇိတကိလေသော. ကိတ္တိဉ္စ သုခဉ္စာတိ ဝဏ္ဏဘဏနဉ္စ ကာယိကစေတသိကသုခဉ္စ. အခိလောဓ ပဓာနဝါတိ အခိလော ဣဓ ပဓာနဝါ ဝီရိယသမ္ပန္နော. ဝိသုဒ္ဓေါတိ ဝိသုဒ္ဓေါ ဘဝေယျ. အသေသန္တိ နိဿေသံ နဝဝိဓံ. ဝိဇ္ဇာယန္တကရောတိ ဝိဇ္ဇာယ ကိလေသာနံ အန္တကရော. သမိတာဝီတိ ရာဂါဒီနံ သမိတတာယ သမိတာဝီ. တတိယံ.