၅. မာနတ္ထဒ္ဓသုတ္တဝဏ္ဏနာ

၂၀၁. ပဉ္စမေ မာနတ္ထဒ္ဓေါတိ ဝါတဘရိတဘသ္တာ ဝိယ မာနေန ထဒ္ဓေါ. အာစရိယန္တိ သိပ္ပုဂ္ဂဟဏကာလေ အာစရိယော အနဘိဝါဒေန္တဿ သိပ္ပံ န ဒေတိ၊ အညသ္မိံ ပန ကာလေ တံ န အဘိဝါဒေတိ၊ အတ္ထိဘာဝမ္ပိဿ န ဇာနာတိ. နာယံ သမဏောတိ ဧဝံ ကိရဿ အဟောသိ – ‘‘ယသ္မာ အယံ သမဏော မာဒိသေ ဇာတိသမ္ပန္နဗြာဟ္မဏေ သမ္ပတ္တေ ပဋိသန္ထာရမတ္တမ္ပိ န ကရောတိ၊ တသ္မာ န ကိဉ္စိ ဇာနာတီ’’တိ.

အဗ္ဘုတဝိတ္တဇာတာတိ အဘူတပုဗ္ဗာယ တုဋ္ဌိယာ သမန္နာဂတာ. ကေသု စဿာတိ ကေသု ဘဝေယျ. ကျဿာတိ ကေ အဿ ပုဂ္ဂလဿ. အပစိတာ အဿူတိ အပစိတိံ ဒဿေတုံ ယုတ္တာ ဘဝေယျုံ. အရဟန္တေတိ ဣမာယ ဂါထာယ ဒေသနာကုသလတ္တာ အတ္တာနံ အန္တောကတွာ ပူဇနေယျံ ဒဿေတိ. ပဉ္စမံ.