၂. ပုရိသသုတ္တဝဏ္ဏနာ

၁၁၃. ဒုတိယေ အဘိဝါဒေတွာတိ ပုရိမသုတ္တေ သရဏဂတတ္တာ ဣဓ အဘိဝါဒေသိ. အဇ္ဈတ္တန္တိ နိယကဇ္ဈတ္တံ၊ အတ္တနော သန္တာနေ ဥပ္ပဇ္ဇန္တီတိ အတ္ထော. လောဘာဒီသု လုဗ္ဘနလက္ခဏော လောဘော၊ ဒုဿနလက္ခဏော ဒေါသော၊ မုယှနလက္ခဏော မောဟောတိ. ဟိံသန္တီတိ ဝိဟေဌေန္တိ နာသေန္တိ ဝိနာသေန္တိ. အတ္တသမ္ဘူတာတိ အတ္တနိ သမ္ဘူတာ. တစသာရံဝ သမ္ဖလန္တိ ယထာ တစသာရံ ဝေဠုံ ဝါ နဠံ ဝါ အတ္တနော ဖလံ ဟိံသတိ ဝိနာသေတိ၊ ဧဝံ ဟိံသန္တိ ဝိနာသေန္တီတိ. ဒုတိယံ.