၅. ဇန္တုသုတ္တဝဏ္ဏနာ

၁၀၆. ပဉ္စမေ ကောသလေသု ဝိဟရန္တီတိ ဘဂဝတော သန္တိကေ ကမ္မဋ္ဌာနံ ဂဟေတွာ တတ္ထ ဂန္တွာ ဝိဟရန္တိ. ဥဒ္ဓတာတိ အကပ္ပိယေ ကပ္ပိယသညိတာယ စ ကပ္ပိယေ အကပ္ပိယသညိတာယ စ အနဝဇ္ဇေ သာဝဇ္ဇသညိတာယ စ သာဝဇ္ဇေ အနဝဇ္ဇသညိတာယ စ ဥဒ္ဓစ္စပကတိကာ ဟုတွာ. ဥန္နဠာတိ ဥဂ္ဂတနဠာ၊ ဥဋ္ဌိတတုစ္ဆမာနာတိ ဝုတ္တံ ဟောတိ. စပလာတိ ပတ္တစီဝရမဏ္ဍနာဒိနာ စာပလ္လေန ယုတ္တာ. မုခရာတိ မုခခရာ၊ ခရဝစနာတိ ဝုတ္တံ ဟောတိ. ဝိကိဏ္ဏဝါစာတိ အသံယတဝစနာ၊ ဒိဝသမ္ပိ နိရတ္ထကဝစနပလာပိနော. မုဋ္ဌဿတိနောတိ နဋ္ဌဿတိနော သတိဝိရဟိတာ၊ ဣဓ ကတံ ဧတ္ထ ပမုဿန္တိ. အသမ္ပဇာနာတိ နိပ္ပညာ. အသမာဟိတာတိ အပ္ပနာဥပစာရသမာဓိရဟိတာ၊ စဏ္ဍသောတေ ဗဒ္ဓနာဝါသဒိသာ. ဝိဗ္ဘန္တစိတ္တာတိ အနဝဋ္ဌိတစိတ္တာ၊ ပန္ထာရုဠှဗာလမိဂသဒိသာ. ပါကတိန္ဒြိယာတိ သံဝရာဘာဝေန ဂိဟိကာလေ ဝိယ ဝိဝဋဣန္ဒြိယာ.

ဇန္တူတိ ဧဝံနာမကော ဒေဝပုတ္တော. တဒဟုပေါသထေတိ တသ္မိံ အဟု ဥပေါသထေ၊ ဥပေါသထဒိဝသေတိ အတ္ထော. ပန္နရသေတိ စာတုဒ္ဒသိကာဒိပဋိက္ခေပေါ. ဥပသင်္ကမီတိ စောဒနတ္ထာယ ဥပဂတော. သော ကိရ စိန္တေသိ – ‘‘ဣမေ ဘိက္ခူ သတ္ထု သန္တိကေ ကမ္မဋ္ဌာနံ ဂဟေတွာ နိက္ခန္တာ၊ ဣဒါနိ ပမတ္တာ ဝိဟရန္တိ၊ န ခေါ ပနေတေ ပါဋိယေက္ကံ နိသိန္နဋ္ဌာနေ စောဒိယမာနာ ကထံ ဂဏှိဿန္တိ၊ သမာဂမနကာလေ စောဒိဿာမီ’’တိ ဥပေါသထဒိဝသေ တေသံ သန္နိပတိတဘာဝံ ဉတွာ ဥပသင်္ကမိ. ဂါထာဟိ အဇ္ဈဘာသီတိ သဗ္ဗေသံ မဇ္ဈေ ဌတွာ ဂါထာ အဘာသိ.

တတ္ထ ယသ္မာ ဂုဏကထာယ သဒ္ဓိံ နိဂ္ဂုဏဿ အဂုဏော ပါကဋော ဟောတိ၊ တသ္မာ ဂုဏံ တာဝ ကထေန္တော သုခဇီဝိနော ပုရေ အာသုန္တိအာဒိမာဟ. တတ္ထ သုခဇီဝိနော ပုရေ အာသုန္တိ ပုဗ္ဗေ ဘိက္ခူ သုပ္ပေါသာ သုဘရာ အဟေသုံ၊ ဥစ္စနီစကုလေသု သပဒါနံ စရိတွာ လဒ္ဓေန မိဿကပိဏ္ဍေန ယာပေသုန္တိ အဓိပ္ပါယေန ဧဝမာဟ. အနိစ္ဆာတိ နိတ္တဏှာ ဟုတွာ.

ဧဝံ ပေါရာဏကဘိက္ခူနံ ဝဏ္ဏံ ကထေတွာ ဣဒါနိ တေသံ အဝဏ္ဏံ ကထေန္တော ဒုပ္ပေါသန္တိအာဒိမာဟ. တတ္ထ ဂါမေ ဂါမဏိကာ ဝိယာတိ ယထာ ဂါမေ ဂါမကုဋာ နာနပ္ပကာရေန ဇနံ ပီဠေတွာ ခီရဒဓိတဏ္ဍုလာဒီနိ အာဟရာပေတွာ ဘုဉ္ဇန္တိ၊ ဧဝံ တုမှေပိ အနေသနာယ ဌိတာ တုမှာကံ ဇီဝိကံ ကပ္ပေထာတိ အဓိပ္ပါယေန ဝဒတိ. နိပဇ္ဇန္တီတိ ဥဒ္ဒေသပရိပုစ္ဆာမနသိကာရေဟိ အနတ္ထိကာ ဟုတွာ သယနမှိ ဟတ္ထပါဒေ ဝိဿဇ္ဇေတွာ နိပဇ္ဇန္တိ. ပရာဂါရေသူတိ ပရဂေဟေသု၊ ကုလသုဏှာဒီသူတိ အတ္ထော. မုစ္ဆိတာတိ ကိလေသမုစ္ဆာယ မုစ္ဆိတာ.

ဧကစ္စေတိ ဝတ္တဗ္ဗယုတ္တကေယေဝ. အပဝိဒ္ဓါတိ ဆဍ္ဍိတကာ. အနာထာတိ အပတိဋ္ဌာ. ပေတာတိ သုသာနေ ဆဍ္ဍိတာ ကာလင်္ကတမနုဿာ. ယထာ ဟိ သုသာနေ ဆဍ္ဍိတာ နာနာသကုဏာဒီဟိ ခဇ္ဇန္တိ၊ ဉာတကာပိ နေသံ နာထကိစ္စံ န ကရောန္တိ၊ န ရက္ခန္တိ၊ န ဂေါပယန္တိ၊ ဧဝမေဝံ ဧဝရူပါပိ အာစရိယုပဇ္ဈာယာဒီနံ သန္တိကာ ဩဝါဒါနုသာသနိံ န လဘန္တီတိ အပဝိဒ္ဓါ အနာထာ၊ ယထာ ပေတာ၊ တထေဝ ဟောန္တိ. ပဉ္စမံ.