၁၀. နာနာတိတ္ထိယသာဝကသုတ္တဝဏ္ဏနာ

၁၁၁. ဒသမေ နာနာတိတ္ထိယသာဝကာတိ တေ ကိရ ကမ္မဝါဒိနော အဟေသုံ၊ တသ္မာ ဒါနာဒီနိ ပုညာနိ ကတွာ သဂ္ဂေ နိဗ္ဗတ္တာ၊ တေ ‘‘အတ္တနော အတ္တနော သတ္ထရိ ပသာဒေန နိဗ္ဗတ္တမှာ’’တိ သညိနော ဟုတွာ ‘‘ဂစ္ဆာမ ဒသဗလဿ သန္တိကေ ဌတွာ အမှာကံ သတ္ထာရာနံ ဝဏ္ဏံ ကထေဿာမာ’’တိ အာဂန္တွာ ပစ္စေကဂါထာဟိ ကထယိံသု. တတ္ထ ဆိန္ဒိတမာရိတေတိ ဆိန္ဒိတေ စ မာရိတေ စ. ဟတဇာနီသူတိ ပေါထနေ စ ဓနဇာနီသု စ. ပုညံ ဝါ ပနာတိ အတ္တနော ပုညမ္ပိ န သမနုပဿတိ၊ သင်္ခေပတော ပုညာပုညာနံ ဝိပါကော နတ္ထီတိ ဝဒတိ. သ ဝေ ဝိဿာသမာစိက္ခီတိ သော – ‘‘ဧဝံ ကတပါပါနမ္ပိ ကတပုညာနမ္ပိ ဝိပါကော နတ္ထီ’’တိ ဝဒန္တော သတ္တာနံ ဝိဿာသံ အဝဿယံ ပတိဋ္ဌံ အာစိက္ခတိ၊ တသ္မာ မာနနံ ဝန္ဒနံ ပူဇနံ အရဟတီတိ ဝဒတိ.

တပေါဇိဂုစ္ဆာယာတိ ကာယကိလမထတပေန ပါပဇိဂုစ္ဆနေန. သုသံဝုတတ္တောတိ သမန္နာဂတော ပိဟိတော ဝါ. ဇေဂုစ္ဆီတိ တပေန ပါပဇိဂုစ္ဆကော. နိပကောတိ ပဏ္ဍိတော. စာတုယာမသုသံဝုတောတိ စာတုယာမေန သုသံဝုတော. စာတုယာမော နာမ သဗ္ဗဝါရိဝါရိတော စ ဟောတိ သဗ္ဗဝါရိယုတ္တော စ သဗ္ဗဝါရိဓုတော စ သဗ္ဗဝါရိဖုဋော စာတိ ဣမေ စတ္တာရော ကောဋ္ဌာသာ. တတ္ထ သဗ္ဗဝါရိဝါရိတောတိ ဝါရိတသဗ္ဗဥဒကော၊ ပဋိက္ခိတ္တသဗ္ဗသီတောဒကောတိ အတ္ထော. သော ကိရ သီတောဒကေ သတ္တသညီ ဟောတိ၊ တသ္မာ တံ န ဝလဉ္ဇေတိ. သဗ္ဗဝါရိယုတ္တောတိ သဗ္ဗေန ပါပဝါရဏေန ယုတော. သဗ္ဗဝါရိဓုတောတိ သဗ္ဗေန ပါပဝါရဏေန ဓုတပါပေါ. သဗ္ဗဝါရိဖုဋောတိ သဗ္ဗေန ပါပဝါရဏေန ဖုဋ္ဌော. ဒိဋ္ဌံ သုတဉ္စ အာစိက္ခန္တိ ဒိဋ္ဌံ ‘‘ဒိဋ္ဌံ မေ’’တိ သုတံ ‘‘သုတံ မေ’’တိ အာစိက္ခန္တော၊ န နိဂုဟန္တော. န ဟိ နူန ကိဗ္ဗိသီတိ ဧဝရူပေါ သတ္ထာ ကိဗ္ဗိသကာရကော နာမ န ဟောတိ.

နာနာတိတ္ထိယေတိ သော ကိရ နာနာတိတ္ထိယာနံယေဝ ဥပဋ္ဌာကော၊ တသ္မာ တေ အာရဗ္ဘ ဝဒတိ. ပကုဓကော ကာတိယာနောတိ ပကုဓော ကစ္စာယနော. နိဂဏ္ဌောတိ နာဋပုတ္တော. မက္ခလိပူရဏာသေတိ မက္ခလိ စ ပူရဏော စ. သာမညပ္ပတ္တာတိ သမဏဓမ္မေ ကောဋိပ္ပတ္တာ. န ဟိ နူန တေတိ သပ္ပုရိသေဟိ န ဒူရေ၊ တေယေဝ လောကေ သပ္ပုရိသာတိ ဝဒတိ. ပစ္စဘာသီတိ ‘‘အယံ အာကောဋကော ဣမေသံ နဂ္ဂနိဿိရိကာနံ ဒသဗလဿ သန္တိကေ ဌတွာ ဝဏ္ဏံ ကထေတီတိ တေသံ အဝဏ္ဏံ ကထေဿာမီ’’တိ ပတိအဘာသီတိ.

တတ္ထ သဟာစရိတေနာတိ သဟ စရိတမတ္တေန. ဆဝေါ သိဂါလောတိ လာမကော ကာလသိဂါလော. ကောတ္ထုကောတိ တဿေဝ ဝေဝစနံ. သင်္ကဿရာစာရောတိ အာသင်္ကိတသမာစာရော. န သတံ သရိက္ခောတိ ပဏ္ဍိတာနံ သပ္ပုရိသာနံ သဒိသော န ဟောတိ၊ ကိံ တွံ ကာလသိဂါလသဒိသေ တိတ္ထိယေ သီဟေ ကရောသီတိ?

အနွာဝိသိတွာတိ ‘‘အယံ ဧဝရူပါနံ သတ္ထာရာနံ အဝဏ္ဏံ ကထေတိ၊ တေနေဝ နံ မုခေန ဝဏ္ဏံ ကထာပေဿာမီ’’တိ စိန္တေတွာ တဿ သရီရေ အနုအာဝိသိ အဓိမုစ္စိ၊ ဧဝံ အနွာဝိသိတွာ. အာယုတ္တာတိ တပေါဇိဂုစ္ဆနေ ယုတ္တပယုတ္တာ. ပါလယံ ပဝိဝေကိယန္တိ ပဝိဝေကံ ပါလယန္တာ. တေ ကိရ ‘‘နှာပိတပဝိဝေကံ ပါလေဿာမာ’’တိ သယံ ကေသေ လုဉ္စန္တိ. ‘‘စီဝရပဝိဝေကံ ပါတေဿာမာ’’တိ နဂ္ဂါ ဝိစရန္တိ. ‘‘ပိဏ္ဍပါတပဝိဝေကံ ပါလေဿာမာ’’တိ သုနခါ ဝိယ ဘူမိယံ ဝါ ဘုဉ္ဇန္တိ ဟတ္ထေသု ဝါ. ‘‘သေနာသနပဝိဝေကံ ပါလေဿာမာ’’တိ ကဏ္ဋကသေယျာဒီနိ ကပ္ပေန္တိ. ရူပေ နိဝိဋ္ဌာတိ တဏှာဒိဋ္ဌီဟိ ရူပေ ပတိဋ္ဌိတာ. ဒေဝလောကာဘိနန္ဒိနောတိ ဒေဝလောကပတ္ထနကာမာ. မာတိယာတိ မစ္စာ၊ တေ ဝေ မစ္စာ ပရလောကတ္ထာယ သမ္မာ အနုသာသန္တီတိ ဝဒတိ.

ဣတိ ဝိဒိတွာတိ ‘‘အယံ ပဌမံ ဧတေသံ အဝဏ္ဏံ ကထေတွာ ဣဒါနိ ဝဏ္ဏံ ကထေတိ၊ ကော နု ခေါ ဧသော’’တိ အာဝဇ္ဇေန္တော ဇာနိတွာဝ. ယေ စန္တလိက္ခသ္မိံ ပဘာသဝဏ္ဏာတိ ယေ အန္တလိက္ခေ စန္ဒောဘာသသူရိယောဘာသသဉ္ဈာရာဂဣန္ဒဓနုတာရကရူပါနံ ပဘာသဝဏ္ဏာ. သဗ္ဗေဝ တေ တေတိ သဗ္ဗေဝ တေ တယာ. နမုစီတိ မာရံ အာလပတိ. အာမိသံဝ မစ္ဆာနံ ဝဓာယ ခိတ္တာတိ ယထာ မစ္ဆာနံ ဝဓတ္ထာယ ဗဠိသလဂ္ဂံ အာမိသံ ခိပတိ၊ ဧဝံ တယာ ပသံသမာနေန ဧတေ ရူပါ သတ္တာနံ ဝဓာယ ခိတ္တာတိ ဝဒတိ.

မာဏဝဂါမိယောတိ အယံ ကိရ ဒေဝပုတ္တော ဗုဒ္ဓုပဋ္ဌာကော. ရာဇဂဟီယာနန္တိ ရာဇဂဟပဗ္ဗတာနံ. သေတောတိ ကေလာသော. အဃဂါမိနန္တိ အာကာသဂါမီနံ. ဥဒဓိနန္တိ ဥဒကနိဓာနာနံ. ဣဒံ ဝုတ္တံ ဟောတိ – ယထာ ရာဇဂဟီယာနံ ပဗ္ဗတာနံ ဝိပုလော သေဋ္ဌော၊ ဟိမဝန္တပဗ္ဗတာနံ ကေလာသော၊ အာကာသဂါမီနံ အာဒိစ္စော၊ ဥဒကနိဓာနာနံ သမုဒ္ဒေါ၊ နက္ခတ္တာနံ စန္ဒော၊ ဧဝံ သဒေဝကဿ လောကဿ ဗုဒ္ဓေါ သေဋ္ဌောတိ. ဒသမံ.

နာနာတိတ္ထိယဝဂ္ဂေါ တတိယော.

ဣတိ သာရတ္ထပ္ပကာသိနိယာ

သံယုတ္တနိကာယ-အဋ္ဌကထာယ

ဒေဝပုတ္တသံယုတ္တဝဏ္ဏနာ နိဋ္ဌိတာ.