၃. သမ္ဗရိမာယာသုတ္တဝဏ္ဏနာ

၂၆၉. တတိယေ အာဗာဓိကောတိ ဣသိဂဏေန အဘိသပကာလေ ဥပ္ပန္နာဗာဓေန အာဗာဓိကော. ဝါစေဟိ မန္တိ သစေ မံ သမ္ဗရိမာယံ ဝါစေသိ၊ ဧဝမဟံ တမ္ပိ တိကိစ္ဆိဿာမီတိ ဝဒတိ. မာ ခေါ တွံ၊ မာရိသ၊ ဝါစေသီတိ ဝိနာပိ တာဝ သမ္ဗရိမာယံ သက္ကော အမှေ ဗာဓတိ၊ ယဒိ ပန တံ ဇာနိဿတိ၊ နဋ္ဌာ မယံ၊ မာ အတ္တနော ဧကဿ အတ္ထာယ အမှေ နာသေဟီတိ ဝတွာ နိဝါရယိံသု. သမ္ဗရောဝ သတံ သမန္တိ ယထာ သမ္ဗရော အသုရိန္ဒော မာယာဝီ မာယံ ပယောဇေတွာ ဝဿသတံ နိရယေ ပက္ကော၊ ဧဝံ ပစ္စတိ. တုမှေ ဓမ္မိကာဝ၊ အလံ ဝေါ မာယာယာတိ ဝဒတိ. ကိံ ပန သက္ကော တဿ ကောဓံ တိကိစ္ဆိတုံ သက္ကုဏေယျာတိ? အာမ သက္ကုဏေယျ. ကထံ? တဒါ ကိရ သော ဣသိဂဏော ဓရတိယေဝ၊ တသ္မာ နံ ဣသီနံ သန္တိကံ နေတွာ ခမာပေယျ၊ ဧဝမဿ ဖာသု ဘဝေယျ. တေန ပန ဝဉ္စိတတ္တာ တထာ အကတွာ ပက္ကန္တောဝ. တတိယံ.