၁. ဝတပဒသုတ္တဝဏ္ဏနာ

၂၅၇. ဒုတိယဝဂ္ဂဿ ပဌမေ ဝတပဒါနီတိ ဝတကောဋ္ဌာသာနိ. သမတ္တာနီတိ ပရိပုဏ္ဏာနိ. သမာဒိန္နာနီတိ ဂဟိတာနိ. ကုလေ ဇေဋ္ဌာပစာယီတိ ကုလဇေဋ္ဌကာနံ မဟာပိတာ မဟာမာတာ စူဠပိတာ စူဠမာတာ မာတုလော မာတုလာနီတိအာဒီနံ အပစိတိကာရကော. သဏှဝါစောတိ ပိယမုဒုမဓုရဝါစော. မုတ္တစာဂေါတိ ဝိဿဋ္ဌစာဂေါ. ပယတပါဏီတိ ဒေယျဓမ္မဒါနတ္ထာယ သဒါ ဓောတဟတ္ထော. ဝေါဿဂ္ဂရတောတိ ဝေါဿဇ္ဇနေ ရတော. ယာစယောဂေါတိ ပရေဟိ ယာစိတဗ္ဗာရဟော၊ ယာစယောဂေါတိ ဝါ ယာစယောဂေနေဝ ယုတ္တော. ဒါနသံဝိဘာဂရတောတိ ဒါနေ စ သံဝိဘာဂေ စ ရတော. ပဌမံ.