၉. ပဌမသုက္ကာသုတ္တဝဏ္ဏနာ

၂၄၃. နဝမေ ရထိကာယ ရထိကန္တိ ဧကံ ရထိကံ ဂဟေတွာ တတော အပရံ ဂစ္ဆန္တော ရထိကာယ ရထိကံ ဥပသင်္ကမန္တော နာမ ဟောတိ. သိင်္ဃာဋကေပိ ဧသေဝ နယော. ဧတ္ထ စ ရထိကာတိ ရစ္ဆာ. သိင်္ဃာဋကန္တိ စတုက္ကံ. ကိံ မေ ကတာတိ ကိံ ဣမေ ကတာ? ကိံ ကရောန္တီတိ အတ္ထော. မဓုပီတာဝ သေယရေတိ ဂန္ဓမဓုပါနံ ပီတာ ဝိယ သယန္တိ. ဂန္ဓမဓုပါနံ ပီတော ကိရ သီသံ ဥက္ခိပိတုံ န သက္ကောတိ၊ အသညီ ဟုတွာ သယတေဝ. တသ္မာ ဧဝမာဟ.

တဉ္စ ပန အပ္ပဋိဝါနီယန္တိ တဉ္စ ပန ဓမ္မံ အပ္ပဋိဝါနီယံ ဒေသေတိ. ဗာဟိရကဉှိ သုမဓုရမ္ပိ ဘောဇနံ ပုနပ္ပုနံ ဘုဉ္ဇန္တဿ န ရုစ္စတိ၊ ‘‘အပနေထ၊ ကိံ ဣမိနာ’’တိ? ပဋိဝါနေတဗ္ဗံ အပနေတဗ္ဗံ ဟောတိ၊ န ဧဝမယံ ဓမ္မော. ဣမံ ဟိ ဓမ္မံ ပဏ္ဍိတာ ဝဿသတမ္ပိ ဝဿသဟဿမ္ပိ သုဏန္တာ တိတ္တိံ န ဂစ္ဆန္တိ. တေနာဟ ‘‘အပ္ပဋိဝါနီယ’’န္တိ. အသေစနကမောဇဝန္တိ အနာသိတ္တကံ ဩဇဝန္တံ. ယထာ ဟိ ဗာဟိရာနိ အသမ္ဘိန္နပါယာသာဒီနိပိ သပ္ပိမဓုသက္ခရာဟိ အာသိတ္တာနိ ယောဇိတာနေဝ မဓုရာနိ ဩဇဝန္တာနိ ဟောန္တိ၊ န ဧဝမယံ ဓမ္မော. အယံ ဟိ အတ္တနော ဓမ္မတာယ မဓုရော စေဝ ဩဇဝါ စ၊ န အညေန ဥပသိတ္တော. တေနာဟ ‘‘အသေစနကမောဇဝ’’န္တိ. ပိဝန္တိ မညေ သပ္ပညာတိ ပဏ္ဍိတပုရိသာ ပိဝန္တိ ဝိယ. ဝလာဟကမေဝ ပန္ထဂူတိ ဝလာဟကန္တရတော နိက္ခန္တဥဒကံ ဃမ္မာဘိတတ္တာ ပထိကာ ဝိယ. နဝမံ.