၈. ဥပ္ပထသုတ္တဝဏ္ဏနာ

၅၈. အဋ္ဌမေ ရာဂေါ ဥပ္ပထောတိ သုဂတိဉ္စ နိဗ္ဗာနဉ္စ ဂစ္ဆန္တဿ အမဂ္ဂေါ. ရတ္တိန္ဒိဝက္ခယောတိ ရတ္တိဒိဝေဟိ၊ ရတ္တိဒိဝေသု ဝါ ခီယတိ. ဣတ္ထီ မလန္တိ သေသံ ဗာဟိရမလံ ဘသ္မခါရာဒီဟိ ဓောဝိတွာ သက္ကာ သောဓေတုံ၊ မာတုဂါမမလေန ဒုဋ္ဌော ပန န သက္ကာ သုဒ္ဓေါ နာမ ကာတုန္တိ ဣတ္ထီ ‘‘မလ’’န္တိ ဝုတ္တာ. ဧတ္ထာတိ ဧတ္ထ ဣတ္ထိယံ ပဇာ သဇ္ဇတိ. တပေါတိ ဣန္ဒြိယသံဝရဓုတင်္ဂဂုဏဝီရိယဒုက္ကရကာရိကာနံ နာမံ၊ ဣဓ ပန ဌပေတွာ ဒုက္ကရကာရိကံ သဗ္ဗာပိ ကိလေသသန္တာပိကာ ပဋိပဒါ ဝဋ္ဋတိ. ဗြဟ္မစရိယန္တိ မေထုနဝိရတိ. အဋ္ဌမံ.