၃. မိတ္တသုတ္တဝဏ္ဏနာ

၅၃. တတိယေ သတ္ထောတိ သဒ္ဓိံစရော၊ ဇင်္ဃသတ္ထော ဝါ သကဋသတ္ထော ဝါ. မိတ္တန္တိ ရောဂေ ဥပ္ပန္နေ ပါဋင်္ကိယာ ဝါ အညေန ဝါ ယာနေန ဟရိတွာ ခေမန္တသမ္ပာပနေန မိတ္တံ. သကေ ဃရေတိ အတ္တနော ဂေဟေ. တထာရူပေ ရောဂေ ဇာတေ ပုတ္တဘရိယာဒယော ဇိဂုစ္ဆန္တိ၊ မာတာ ပန အသုစိမ္ပိ စန္ဒနံ ဝိယ မညတိ. တသ္မာ သာ သကေ ဃရေ မိတ္တံ. သဟာယော အတ္ထဇာတဿာတိ ဥပ္ပန္နကိစ္စဿ ယော တံ ကိစ္စံ ဝဟတိ နိတ္ထရတိ၊ သော ကိစ္စေသု သဟ အယနဘာဝေန သဟာယော မိတ္တံ၊ သုရာပါနာဒိသဟာယာ ပန န မိတ္တာ. သမ္ပရာယိကန္တိ သမ္ပရာယဟိတံ. တတိယံ.