၁. ဇရာသုတ္တဝဏ္ဏနာ

၅၁. ဇရာဝဂ္ဂဿ ပဌမေ သာဓူတိ လဒ္ဓကံ ဘဒ္ဒကံ. သီလံ ယာဝ ဇရာတိ ဣမိနာ ဣဒံ ဒဿေတိ – ယထာ မုတ္တာမဏိရတ္တဝတ္ထာဒီနိ အာဘရဏာနိ တရုဏကာလေယေဝ သောဘန္တိ၊ ဇရာဇိဏ္ဏကာလေ တာနိ ဓာရေန္တော ‘‘အယံ အဇ္ဇာပိ ဗာလဘာဝံ ပတ္ထေတိ၊ ဥမ္မတ္တကော မညေ’’တိ ဝတ္တဗ္ဗတံ အာပဇ္ဇတိ၊ န ဧဝံ သီလံ. သီလဉှိ နိစ္စကာလံ သောဘတိ. ဗာလကာလေပိ ဟိ သီလံ ရက္ခန္တံ ‘‘ကိံ ဣမဿ သီလေနာ’’တိ? ဝတ္တာရော နတ္ထိ. မဇ္ဈိမကာလေပိ မဟလ္လကကာလေပီတိ.

သဒ္ဓါ သာဓု ပတိဋ္ဌိတာတိ ဟတ္ထာဠဝကစိတ္တဂဟပတိအာဒီနံ ဝိယ မဂ္ဂေန အာဂတာ ပတိဋ္ဌိတသဒ္ဓါ နာမ သာဓု. ပညာ နရာနံ ရတနန္တိ ဧတ္ထ စိတ္တီကတဋ္ဌာဒီဟိ ရတနံ ဝေဒိတဗ္ဗံ. ဝုတ္တဉှေတံ –

‘‘ယဒိ စိတ္တီကတန္တိ ရတနံ၊ နနု ဘဂဝါ စိတ္တီကတော ပုရိသသီဟော၊ ယေ စ လောကေ စိတ္တီကတာ၊ တေသံ စိတ္တီကတော ဘဂဝါ. ယဒိ ရတိကရန္တိ ရတနံ၊ နနု ဘဂဝါ ရတိကရော ပုရိသသီဟော၊ တဿ ဝစနေန စရန္တာ ဈာနရတိသုခေန အဘိရမန္တိ. ယဒိ အတုလျန္တိ ရတနံ၊ နနု ဘဂဝါ အတုလော ပုရိသသီဟော. န ဟိ သက္ကာ တုလေတုံ ဂုဏေဟိ ဂုဏပါရမိံ ဂတော. ယဒိ ဒုလ္လဘန္တိ ရတနံ၊ နနု ဘဂဝါ ဒုလ္လဘော ပုရိသသီဟော. ယဒိ အနောမသတ္တပရိဘောဂန္တိ ရတနံ၊ နနု ဘဂဝါ အနောမော သီလေန သမာဓိနာ ပညာယ ဝိမုတ္တိယာ ဝိမုတ္တိဉာဏဒဿနေနာ’’တိ.

ဣဓ ပန ဒုလ္လဘပါတုဘာဝဋ္ဌေန ပညာ ‘‘ရတန’’န္တိ ဝုတ္တံ. ပုညန္တိ ပုညစေတနာ၊ သာ ဟိ အရူပတ္တာ ပရိဟရိတုံ န သက္ကာတိ. ပဌမံ.