၉. မာနကာမသုတ္တဝဏ္ဏနာ

၉. နဝမေ မာနကာမဿာတိ မာနံ ကာမေန္တဿ ဣစ္ဆန္တဿ. ဒမောတိ ဧဝရူပဿ ပုဂ္ဂလဿ သမာဓိပက္ခိကော ဒမော နတ္ထီတိ ဝဒတိ. ‘‘သစ္စေန ဒန္တော ဒမသာ ဥပေတော၊ ဝေဒန္တဂူ ဝုသိတဗြဟ္မစရိယော’’တိ (သံ. နိ. ၁.၁၉၅) ဧတ္ထ ဟိ ဣန္ဒြိယသံဝရော ဒမောတိ ဝုတ္တော. ‘‘ယဒိ သစ္စာ ဒမာ စာဂါ၊ ခန္တျာ ဘိယျောဓ ဝိဇ္ဇတီ’’တိ (သံ. နိ. ၁.၂၄၆၊ သု. နိ. ၁၉၁) ဧတ္ထ ပညာ. ‘‘ဒါနေန ဒမေန သံယမေန သစ္စဝဇ္ဇေန အတ္ထိ ပုညံ၊ အတ္ထိ ပုညဿ အာဂမော’’တိ (သံ. နိ. ၄.၃၆၅) ဧတ္ထ ဥပေါသထကမ္မံ. ‘‘သက္ခိဿသိ ခေါ တွံ၊ ပုဏ္ဏ၊ ဣမိနာ ဒမူပသမေန သမန္နာဂတော သုနာပရန္တသ္မိံ ဇနပဒေ ဝိဟရိတု’’န္တိ (သံ. နိ. ၄.၈၈၊ မ. နိ. ၃.၃၉၆) ဧတ္ထ အဓိဝါသနခန္တိ. ဣမသ္မိံ ပန သုတ္တေ ဒမောတိ သမာဓိပက္ခိကဓမ္မာနံ ဧတံ နာမံ. တေနေဝါဟ – ‘‘န မောနမတ္ထိ အသမာဟိတဿာ’’တိ. တတ္ထ မောနန္တိ စတုမဂ္ဂဉာဏံ၊ တဉှိ မုနာတီတိ မောနံ၊ စတုသစ္စဓမ္မေ ဇာနာတီတိ အတ္ထော. မစ္စုဓေယျဿာတိ တေဘူမကဝဋ္ဋဿ. တဉှိ မစ္စုနော ပတိဋ္ဌာနဋ္ဌေန မစ္စုဓေယျန္တိ ဝုစ္စတိ. ပါရန္တိ တဿေဝ ပါရံ နိဗ္ဗာနံ. တရေယျာတိ ပဋိဝိဇ္ဈေယျ ပါပုဏေယျ ဝါ. ဣဒံ ဝုတ္တံ ဟောတိ – ဧကော အရညေ ဝိဟရန္တော ပမတ္တော ပုဂ္ဂလော မစ္စုဓေယျဿ ပါရံ န တရေယျ န ပဋိဝိဇ္ဈေယျ န ပါပုဏေယျာတိ.

မာနံ ပဟာယာတိ အရဟတ္တမဂ္ဂေန နဝဝိဓမာနံ ပဇဟိတွာ. သုသမာဟိတတ္တောတိ ဥပစာရပ္ပနာသမာဓီဟိ သုဋ္ဌု သမာဟိတတ္တော. သုစေတသောတိ ဉာဏသမ္ပယုတ္တတာယ သုန္ဒရစိတ္တော. ဉာဏဝိပ္ပယုတ္တစိတ္တေန ဟိ သုစေတသောတိ န ဝုစ္စတိ၊ တသ္မာ ဉာဏသမ္ပယုတ္တေန သုစေတသော ဟုတွာတိ အတ္ထော. သဗ္ဗဓိ ဝိပ္ပမုတ္တောတိ သဗ္ဗေသု ခန္ဓာယတနာဒီသု ဝိပ္ပမုတ္တော ဟုတွာ. တရေယျာတိ ဧတ္ထ တေဘူမကဝဋ္ဋံ သမတိက္ကမန္တော နိဗ္ဗာနံ ပဋိဝိဇ္ဈန္တော တရတီတိ ပဋိဝေဓတရဏံ နာမ ဝုတ္တံ. ဣတိ ဣမာယ ဂါထာယ တိဿော သိက္ခာ ကထိတာ ဟောန္တိ. ကထံ – မာနော နာမာယံ သီလဘေဒနော၊ တသ္မာ ‘‘မာနံ ပဟာယာ’’တိ ဣမိနာ အဓိသီလသိက္ခာ ကထိတာ ဟောတိ. ‘‘သုသမာဟိတတ္တော’’တိ ဣမိနာ အဓိစိတ္တသိက္ခာ. ‘‘သုစေတသော’’တိ ဧတ္ထ စိတ္တေန ပညာ ဒဿိတာ၊ တသ္မာ ဣမိနာ အဓိပညာသိက္ခာ ကထိတာ. အဓိသီလဉ္စ နာမ သီလေ သတိ ဟောတိ၊ အဓိစိတ္တံ စိတ္တေ သတိ၊ အဓိပညာ ပညာယ သတိ. တသ္မာ သီလံ နာမ ပဉ္စပိ ဒသပိ သီလာနိ၊ ပါတိမောက္ခသံဝရော အဓိသီလံ နာမာတိ ဝေဒိတဗ္ဗံ. အဋ္ဌ သမာပတ္တိယော စိတ္တံ၊ ဝိပဿနာပါဒကဇ္ဈာနံ အဓိစိတ္တံ. ကမ္မဿကတဉာဏံ ပညာ၊ ဝိပဿနာ အဓိပညာ. အနုပ္ပန္နေပိ ဟိ ဗုဒ္ဓုပ္ပါဒေ ပဝတ္တတီတိ ပဉ္စသီလံ ဒသသီလံ သီလမေဝ၊ ပါတိမောက္ခသံဝရသီလံ ဗုဒ္ဓုပ္ပါဒေယေဝ ပဝတ္တတီတိ အဓိသီလံ. စိတ္တပညာသုပိ ဧသေဝ နယော. အပိစ နိဗ္ဗာနံ ပတ္ထယန္တေန သမာဒိန္နံ ပဉ္စသီလမ္ပိ ဒသသီလမ္ပိ အဓိသီလမေဝ. သမာပန္နာ အဋ္ဌ သမာပတ္တိယောပိ အဓိစိတ္တမေဝ. သဗ္ဗမ္ပိ ဝါ လောကိယသီလံ သီလမေဝ၊ လောကုတ္တရံ အဓိသီလံ. စိတ္တပညာသုပိ ဧသေဝ နယောတိ. ဣတိ ဣမာယ ဂါထာယ သမောဓာနေတွာ တိဿော သိက္ခာ သကလသာသနံ ကထိတံ ဟောတီတိ.

မာနကာမသုတ္တဝဏ္ဏနာ နိဋ္ဌိတာ.