၁၀. အပဏ္ဏကသုတ္တဝဏ္ဏနာ

၉၂. ဧဝံ မေ သုတန္တိ အပဏ္ဏကသုတ္တံ. တတ္ထ စာရိကန္တိ အတုရိတစာရိကံ.

၉၃. အတ္ထိ ပန ဝေါ ဂဟပတယောတိ ကသ္မာ အာဟ? သော ကိရ ဂါမော အဋဝိဒွါရေ နိဝိဋ္ဌော. နာနာဝိဓာ သမဏဗြာဟ္မဏာ ဒိဝသံ မဂ္ဂံ ဂန္တွာ သာယံ တံ ဂါမံ ဝါသတ္ထာယ ဥပေန္တိ၊ တေသံ တေ မနုဿာ မဉ္စပီဌာနိ ပတ္ထရိတွာ ပါဒေ ဓောဝိတွာ ပါဒေ မက္ခေတွာ ကပ္ပိယပါနကာနိ ဒတွာ ပုနဒိဝသေ နိမန္တေတွာ ဒါနံ ဒေန္တိ. တေ ပသန္နစိတ္တာ တေဟိ သဒ္ဓိံ သမ္မန္တယမာနာ ဧဝံ ဝဒန္တိ ‘‘အတ္ထိ ပန ဝေါ ဂဟပတယော ကိဉ္စိ ဒဿနံ ဂဟိတ’’န္တိ? နတ္ထိ၊ ဘန္တေတိ. ‘‘ဂဟပတယော ဝိနာ ဒဿနေန လောကော န နိယျာတိ၊ ဧကံ ဒဿနံ ရုစ္စိတွာ ခမာပေတွာ ဂဟေတုံ ဝဋ္ဋတိ၊ ‘သဿတော လောကော’တိ ဒဿနံ ဂဏှထာ’’တိ ဝတွာ ပက္ကန္တာ. အပရဒိဝသေ အညေ အာဂတာ. တေပိ တထေဝ ပုစ္ဆိံသု. တေ တေသံ ‘‘အာမ၊ ဘန္တေ၊ ပုရိမေသု ဒိဝသေသု တုမှာဒိသာ သမဏဗြာဟ္မဏာ အာဂန္တွာ ‘သဿတော လောကော’တိ အမှေ ဣဒံ ဒဿနံ ဂါဟာပေတွာ ဂတာ’’တိ အာရောစေသုံ. ‘‘တေ ဗာလာ ကိံ ဇာနန္တိ? ‘ဥစ္ဆိဇ္ဇတိ အယံ လောကော’တိ ဥစ္ဆေဒဒဿနံ ဂဏှထာ’’တိ ဧဝံ တေပိ ဥစ္ဆေဒဒဿနံ ဂဏှာပေတွာ ပက္ကန္တာ. ဧတေနုပါယေန အညေ ဧကစ္စသဿတံ၊ အညေ အန္တာနန္တံ၊ အညေ အမရာဝိက္ခေပန္တိ ဧဝံ ဒွါသဋ္ဌိ ဒိဋ္ဌိယော ဥဂ္ဂဏှာပေသုံ. တေ ပန ဧကဒိဋ္ဌိယမ္ပိ ပတိဋ္ဌာတုံ နာသက္ခိံသု. သဗ္ဗပစ္ဆာ ဘဂဝါ အဂမာသိ. သော တေသံ ဟိတတ္ထာယ ပုစ္ဆန္တော ‘‘အတ္ထိ ပန ဝေါ ဂဟပတယော’’တိအာဒိမာဟ. တတ္ထ အာကာရဝတီတိ ကာရဏဝတီ သဟေတုကာ. အပဏ္ဏကောတိ အဝိရဒ္ဓေါ အဒွေဇ္ဈဂါမီ ဧကံသဂါဟိကော.

၉၄. နတ္ထိ ဒိန္နန္တိအာဒိ ဒသဝတ္ထုကာ မိစ္ဆာဒိဋ္ဌိ ဟေဋ္ဌာ သာလေယျကသုတ္တေ ဝိတ္ထာရိတာ. တထာ တဗ္ဗိပစ္စနီကဘူတာ သမ္မာဒိဋ္ဌိ.

၉၅. နေက္ခမ္မေ အာနိသံသန္တိ ယော နေသံ အကုသလတော နိက္ခန္တဘာဝေ အာနိသံသော၊ ယော စ ဝေါဒါနပက္ခော ဝိသုဒ္ဓိပက္ခော၊ တံ န ပဿန္တီတိ အတ္ထော. အသဒ္ဓမ္မသညတ္တီတိ အဘူတဓမ္မသညာပနာ. အတ္တာနုက္ကံသေတီတိ ဌပေတွာ မံ ကော အညော အတ္တနော ဒဿနံ ပရေ ဂဏှာပေတုံ သက္ကောတီတိ အတ္တာနံ ဥက္ခိပတိ. ပရံ ဝမ္ဘေတီတိ ဧတ္တကေသု ဇနေသု ဧကောပိ အတ္တနော ဒဿနံ ပရေ ဂဏှာပေတုံ န သက္ကောတီတိ ဧဝံ ပရံ ဟေဋ္ဌာ ခိပတိ. ပုဗ္ဗေဝ ခေါ ပနာတိ ပုဗ္ဗေ မိစ္ဆာဒဿနံ ဂဏှန္တဿေဝ သုသီလျံ ပဟီနံ ဟောတိ၊ ဒုဿီလဘာဝေါ ပစ္စုပဋ္ဌိတော. ဧဝမဿိမေတိ ဧဝံ အဿ ဣမေ မိစ္ဆာဒိဋ္ဌိအာဒယော သတ္တ. အပရာပရံ ဥပ္ပဇ္ဇနဝသေန ပန တေယေဝ မိစ္ဆာဒိဋ္ဌိပစ္စယာ အနေကေ ပါပကာ အကုသလာ ဓမ္မာ ဥပ္ပဇ္ဇန္တိ နာမ.

တတြာတိ တာသု တေသံ သမဏဗြာဟ္မဏာနံ လဒ္ဓီသု. ကလိဂ္ဂဟောတိ ပရာဇယဂ္ဂါဟော. ဒုဿမတ္တော သမာဒိန္နောတိ ဒုဂ္ဂဟိတော ဒုပ္ပရာမဋ္ဌော. ဧကံသံ ဖရိတွာ တိဋ္ဌတီတိ ဧကန္တံ ဧကကောဋ္ဌာသံ သကဝါဒမေဝ ဖရိတွာ အဓိမုစ္စိတွာ တိဋ္ဌတိ၊ ‘‘သစေ ခေါ နတ္ထိ ပရော လောကော’’တိ ဧဝံ သန္တေယေဝ သောတ္ထိဘာဝါဝဟော ဟောတိ. ရိဉ္စတီတိ ဝဇ္ဇေတိ.

၉၆. သဒ္ဓမ္မသညတ္တီတိ ဘူတဓမ္မသညာပနာ.

ကဋဂ္ဂဟောတိ ဇယဂ္ဂါဟော. သုသမတ္တော သမာဒိန္နောတိ သုဂ္ဂဟိတော သုပရာမဋ္ဌော. ဥဘယံသံ ဖရိတွာ တိဋ္ဌတီတိ ဥဘယန္တံ ဥဘယကောဋ္ဌာသံ သကဝါဒံ ပရဝါဒဉ္စ ဖရိတွာ အဓိမုစ္စိတွာ တိဋ္ဌတိ ‘‘သစေ ခေါ အတ္ထိ ပရော လောကော’’တိ ဧဝံ သန္တေပိ ‘‘သစေ ခေါ နတ္ထိ ပရော လောကော’’တိ ဧဝံ သန္တေပိ သောတ္ထိဘာဝါဝဟော ဟောတိ. ပရတောပိ ဧကံသဥဘယံသေသု ဣမိနာဝ နယေန အတ္ထော ဝေဒိတဗ္ဗော.

၉၇. ကရောတောတိ သဟတ္ထာ ကရောန္တဿ. ကာရယတောတိ အာဏတ္တိယာ ကာရေန္တဿ. ဆိန္ဒတောတိ ပရေသံ ဟတ္ထာဒီနိ ဆိန္ဒန္တဿ. ပစတောတိ ဒဏ္ဍေန ပီဠေန္တဿ ဝါ တဇ္ဇေန္တဿ ဝါ. သောစယတောတိ ပရဿ ဘဏ္ဍဟရဏာဒီဟိ သောကံ သယံ ကရောန္တဿပိ ပရေဟိ ကာရေန္တဿပိ. ကိလမတောတိ အာဟာရူပစ္ဆေဒ-ဗန္ဓနာဂါရပ္ပဝေသနာဒီဟိ သယံ ကိလမန္တဿာပိ ပရေဟိ ကိလမာပေန္တဿာပိ. ဖန္ဒတော ဖန္ဒာပယတောတိ ပရံ ဖန္ဒန္တံ ဖန္ဒနကာလေ သယမ္ပိ ဖန္ဒတော ပရမ္ပိ ဖန္ဒာပယတော. ပါဏမတိပါတယတောတိ ပါဏံ ဟနန္တဿပိ ဟနာပေန္တဿပိ. ဧဝံ သဗ္ဗတ္ထ ကရဏကာရာပနဝသေနေဝ အတ္ထော ဝေဒိတဗ္ဗော.

သန္ဓိန္တိ ဃရသန္ဓိံ. နိလ္လောပန္တိ မဟာဝိလောပံ. ဧကာဂါရိကန္တိ ဧကမေဝ ဃရံ ပရိဝါရေတွာ ဝိလုမ္ပနံ. ပရိပန္ထေ တိဋ္ဌတောတိ အာဂတာဂတာနံ အစ္ဆိန္ဒနတ္ထံ မဂ္ဂေ တိဋ္ဌတော. ကရောတော န ကရီယတိ ပါပန္တိ ယံကိဉ္စိ ပါပံ ကရောမီတိ သညာယ ကရောတောပိ ပါပံ န ကရီယတိ၊ နတ္ထိ ပါပံ. သတ္တာ ပန ကရောမာတိ ဧဝံသညိနော ဟောန္တီတိ အတ္ထော. ခုရပရိယန္တေနာတိ ခုရနေမိနာ၊ ခုရဓာရသဒိသပရိယန္တေန ဝါ. ဧကံ မံသခလန္တိ ဧကံ မံသရာသိံ. ပုဉ္ဇန္တိ တဿေဝ ဝေဝစနံ. တတောနိဒါနန္တိ ဧကမံသခလကရဏနိဒါနံ. ဒက္ခိဏတီရေ မနုဿာ ကက္ခဠာ ဒါရုဏာ၊ တေ သန္ဓာယ ဟနန္တောတိအာဒိ ဝုတ္တံ. ဥတ္တရတီရေ သဒ္ဓါ ဟောန္တိ ပသန္နာ ဗုဒ္ဓမာမကာ ဓမ္မမာမကာ သံဃမာမကာ၊ တေ သန္ဓာယ ဒဒန္တောတိအာဒိ ဝုတ္တံ.

တတ္ထ ယဇန္တောတိ မဟာယာဂံ ကရောန္တော. ဒမေနာတိ ဣန္ဒြိယဒမေန ဥပေါသထကမ္မေန. သံယမေနာတိ သီလသံယမေန. သစ္စဝဇ္ဇေနာတိ သစ္စဝစနေန. အာဂမောတိ အာဂမနံ၊ ပဝတ္တီတိ အတ္ထော. သဗ္ဗထာပိ ပါပပုညာနံ ကိရိယမေဝ ပဋိက္ခိပန္တိ. သုက္ကပက္ခောပိ ဝုတ္တနယေနေဝ ဝေဒိတဗ္ဗော. သေသမေတ္ထ ပုရိမဝါရေ ဝုတ္တသဒိသမေဝ.

၁၀၀. နတ္ထိ ဟေတု နတ္ထိ ပစ္စယောတိ ဧတ္ထ ပစ္စယော ဟေတုဝေဝစနံ. ဥဘယေနာပိ ဝိဇ္ဇမာနကမေဝ ကာယဒုစ္စရိတာဒိသံကိလေသပစ္စယံ ကာယသုစရိတာဒိဝိသုဒ္ဓိပစ္စယံ ပဋိက္ခိပန္တိ. နတ္ထိ ဗလံ၊ နတ္ထိ ဝီရိယံ၊ နတ္ထိ ပုရိသထာမော၊ နတ္ထိ ပုရိသပရက္ကမောတိ သတ္တာနံ သံကိလေသိတုံ ဝါ ဝိသုဇ္ဈိတုံ ဝါ ဗလံ ဝါ ဝီရိယံ ဝါ ပုရိသေန ကာတဗ္ဗော နာမ ပုရိသထာမော ဝါ ပုရိသပရက္ကမော ဝါ နတ္ထိ.

သဗ္ဗေ သတ္တာတိ ဩဋ္ဌဂေါဏဂဒြဘာဒယော အနဝသေသေ နိဒဿေန္တိ. သဗ္ဗေ ပါဏာတိ ဧကိန္ဒြိယော ပါဏော ဒွိန္ဒြိယော ပါဏောတိ အာဒိဝသေန ဝဒန္တိ. သဗ္ဗေ ဘူတာတိ အဏ္ဍကောသဝတ္ထိကောသေသု ဘူတေ သန္ဓာယ ဝဒန္တိ. သဗ္ဗေ ဇီဝါတိ သာလိယဝဂေါဓုမာဒယော သန္ဓာယ ဝဒန္တိ. တေသု ဟေတေ ဝိရုဟနဘာဝေန ဇီဝသညိနော. အဝသာ အဗလာ အဝီရိယာတိ တေသံ အတ္တနော ဝသော ဝါ ဗလံ ဝါ ဝီရိယံ ဝါ နတ္ထိ. နိယတိသင်္ဂတိဘာဝပရိဏတာတိ ဧတ္ထ နိယတီတိ နိယတတာ. သင်္ဂတီတိ ဆန္နံ အဘိဇာတီနံ တတ္ထ တတ္ထ ဂမနံ. ဘာဝေါတိ သဘာဝေါယေဝ. ဧဝံ နိယတိယာ စ သင်္ဂတိယာ စ ဘာဝေန စ ပရိဏတာ နာနပ္ပကာရတံ ပတ္တာ. ယေန ဟိ ယထာ ဘဝိတဗ္ဗံ၊ သော တထေဝ ဘဝတိ. ယေန နော ဘဝိတဗ္ဗံ၊ သော န ဘဝတီတိ ဒဿေန္တိ. ဆသွေဝါဘိဇာတီသူတိ ဆသု ဧဝ အဘိဇာတီသု ဌတွာ သုခဉ္စ ဒုက္ခဉ္စ ပဋိသံဝေဒေန္တိ၊ အညာ သုခဒုက္ခဘူမိ နတ္ထီတိ ဒဿေန္တိ.

တတ္ထ ဆ အဘိဇာတိယော နာမ ကဏှာဘိဇာတိ နီလာဘိဇာတိ လောဟိတာဘိဇာတိ ဟလိဒ္ဒါဘိဇာတိ သုက္ကာဘိဇာတိ ပရမသုက္ကာဘိဇာတီတိ. တတ္ထ သာကုဏိကော သူကရိကော လုဒ္ဒေါ မစ္ဆဃာတကော စောရော စောရဃာတကော၊ ယေ ဝါ ပနညေပိ ကေစိ ကုရူရကမ္မန္တာ၊ အယံ ကဏှာဘိဇာတိ နာမ. ဘိက္ခူ နီလာဘိဇာတီတိ ဝဒန္တိ. တေ ကိရ စတူသု ပစ္စယေသု ကဏ္ဋကေ ပက္ခိပိတွာ ခါဒန္တိ. ‘‘ဘိက္ခူ စ ကဏ္ဋကဝုတ္တိနော’’တိ အယဉှိ နေသံ ပါဠိယေဝ. အထ ဝါ ကဏ္ဋကဝုတ္တိကာ ဧဝံ နာမ ဧကေ ပဗ္ဗဇိတာတိ ဝဒန္တိ. ‘‘သမဏကဏ္ဋကဝုတ္တိကာ’’တိပိ ဟိ နေသံ ပါဠိ. လောဟိတာဘိဇာတိ နာမ နိဂဏ္ဌာ ဧကသာဋကာတိ ဝဒန္တိ. ဣမေ ကိရ ပုရိမေဟိ ဒွီဟိ ပဏ္ဍရတရာ. ဂိဟီ အစေလကသာဝကာ ဟလိဒ္ဒါဘိဇာတီတိ ဝဒန္တိ. ဣတိ အတ္တနော ပစ္စယဒါယကေ နိဂဏ္ဌေဟိပိ ဇေဋ္ဌကတရေ ကရောန္တိ. နန္ဒော၊ ဝစ္ဆော၊ သင်္ကိစ္စော၊ အယံ သုက္ကာဘိဇာတီတိ ဝဒန္တိ. တေ ကိရ ပုရိမေဟိ စတူဟိ ပဏ္ဍရတရာ. အာဇီဝကေ ပန ပရမသုက္ကာဘိဇာတီတိ ဝဒန္တိ. တေ ကိရ သဗ္ဗေဟိ ပဏ္ဍရတရာ.

တတ္ထ သဗ္ဗေ သတ္တာ ပဌမံ သာကုဏိကာဒယောဝ ဟောန္တိ၊ တတော ဝိသုဇ္ဈမာနာ သကျသမဏာ ဟောန္တိ၊ တတော ဝိသုဇ္ဈမာနာ နိဂဏ္ဌာ၊ တတော အာဇီဝကသာဝကာ၊ တတော နန္ဒာဒယော၊ တတော အာဇီဝကာတိ အယမေတေသံ လဒ္ဓိ. သုက္ကပက္ခော ဝုတ္တပစ္စနီကေန ဝေဒိတဗ္ဗော. သေသမိဓာပိ ပုရိမဝါရေ ဝုတ္တသဒိသမေဝ.

ဣမာသု ပန တီသု ဒိဋ္ဌီသု နတ္ထိကဒိဋ္ဌိ ဝိပါကံ ပဋိဗာဟတိ၊ အကိရိယဒိဋ္ဌိ ကမ္မံ ပဋိဗာဟတိ၊ အဟေတုကဒိဋ္ဌိ ဥဘယမ္ပိ ပဋိဗာဟတိ. တတ္ထ ကမ္မံ ပဋိဗာဟန္တေနာပိ ဝိပါကော ပဋိဗာဟိတော ဟောတိ၊ ဝိပါကံ ပဋိဗာဟန္တေနာပိ ကမ္မံ ပဋိဗာဟိတံ. ဣတိ သဗ္ဗေပေတေ အတ္ထတော ဥဘယပဋိဗာဟကာ နတ္ထိကဝါဒါ စေဝ အဟေတုကဝါဒါ အကိရိယဝါဒါ စ ဟောန္တိ. ယေ ပန တေသံ လဒ္ဓိံ ဂဟေတွာ ရတ္တိဋ္ဌာနေ ဒိဝါဋ္ဌာနေ နိသိန္နာ သဇ္ဈာယန္တိ ဝီမံသန္တိ၊ တေသံ – ‘‘နတ္ထိ ဒိန္နံ နတ္ထိ ယိဋ္ဌံ၊ ကရောတော န ကရိယတိ ပါပံ၊ နတ္ထိ ဟေတု နတ္ထိ ပစ္စယော’’တိ တသ္မိံ အာရမ္မဏေ မိစ္ဆာသတိ သန္တိဋ္ဌတိ၊ စိတ္တံ ဧကဂ္ဂံ ဟောတိ၊ ဇဝနာနိ ဇဝန္တိ၊ ပဌမဇဝနေ သတေကိစ္ဆာ ဟောန္တိ၊ တထာ ဒုတိယာဒီသု. သတ္တမေ ဗုဒ္ဓါနမ္ပိ အတေကိစ္ဆာ အနိဝတ္တိနော အရိဋ္ဌကဏ္ဋကသဒိသာ.

တတ္ထ ကောစိ ဧကံ ဒဿနံ ဩက္ကမတိ၊ ကောစိ ဒွေ၊ ကောစိ တီဏိပိ၊ ဧကသ္မိံ ဩက္ကန္တေပိ ဒွီသု တီသု ဩက္ကန္တေသုပိ နိယတမိစ္ဆာဒိဋ္ဌိကောဝ ဟောတိ၊ ပတ္တော သဂ္ဂမဂ္ဂါဝရဏဉ္စေဝ မောက္ခမဂ္ဂါဝရဏဉ္စ၊ အဘဗ္ဗော တဿ အတ္တဘာဝဿ အနန္တရံ သဂ္ဂမ္ပိ ဂန္တုံ၊ ပဂေဝ မောက္ခံ. ဝဋ္ဋခါဏု နာမေသ သတ္တော ပထဝီဂေါပကော. ကိံ ပနေသ ဧကသ္မိံယေဝ အတ္တဘာဝေ နိယတော ဟောတိ၊ ဥဒါဟု အညသ္မိမ္ပီတိ? ဧကသ္မိညေဝ နိယတော၊ အာသေဝနဝသေန ပန ဘဝန္တရေပိ တံ တံ ဒိဋ္ဌိံ ရောစေတိယေဝ. ဧဝရူပဿ ဟိ ယေဘုယျေန ဘဝတော ဝုဋ္ဌာနံ နာမ နတ္ထိ.

တသ္မာ အကလျာဏဇနံ၊ အာသီဝိသမိဝေါရဂံ၊

အာရကာ ပရိဝဇ္ဇေယျ၊ ဘူတိကာမော ဝိစက္ခဏောတိ.

၁၀၃. နတ္ထိ သဗ္ဗသော အာရုပ္ပါတိ အရူပဗြဟ္မလောကော နာမ သဗ္ဗာကာရေန နတ္ထိ. မနောမယာတိ ဈာနစိတ္တမယာ. သညာမယာတိ အရူပဇ္ဈာနသညာယ သညာမယာ. ရူပါနံယေဝ နိဗ္ဗိဒါယ ဝိရာဂါယ နိရောဓာယ ပဋိပန္နော ဟောတီတိ အယံ လာဘီ ဝါ ဟောတိ တက္ကီ ဝါ. လာဘီ နာမ ရူပါဝစရဇ္ဈာနလာဘီ. တဿ ရူပါဝစရေ ကင်္ခါ နတ္ထိ၊ အရူပါဝစရလောကေ အတ္ထိ. သော – ‘‘အဟံ အာရုပ္ပါ အတ္ထီတိ ဝဒန္တာနမ္ပိ နတ္ထီတိ ဝဒန္တာနမ္ပိ သုဏာမိ၊ အတ္ထိ နတ္ထီတိ ပန န ဇာနာမိ. စတုတ္ထဇ္ဈာနံ ပဒဋ္ဌာနံ ကတွာ အရူပါဝစရဇ္ဈာနံ နိဗ္ဗတ္တေဿာမိ. သစေ အာရုပ္ပါ အတ္ထိ၊ တတ္ထ နိဗ္ဗတ္တိဿာမိ၊ သစေ နတ္ထိ၊ ရူပါဝစရဗြဟ္မလောကေ နိဗ္ဗတ္တိဿာမိ. ဧဝံ မေ အပဏ္ဏကော ဓမ္မော အပဏ္ဏကောဝ အဝိရဒ္ဓေါဝ ဘဝိဿတီ’’တိ တထာ ပဋိပဇ္ဇတိ. တက္ကီ ပန အပ္ပဋိလဒ္ဓဇ္ဈာနော၊ တဿာပိ ရူပဇ္ဈာနေ ကင်္ခါ နတ္ထိ၊ အရူပလောကေ ပန အတ္ထိ. သော – ‘‘အဟံ အာရုပ္ပါ အတ္ထီတိ ဝဒန္တာနမ္ပိ နတ္ထီတိ ဝဒန္တာနမ္ပိ သုဏာမိ၊ အတ္ထိ နတ္ထီတိ ပန န ဇာနာမိ. ကသိဏပရိကမ္မံ ကတွာ စတုတ္ထဇ္ဈာနံ နိဗ္ဗတ္တေတွာ တံ ပဒဋ္ဌာနံ ကတွာ အရူပါဝစရဇ္ဈာနံ နိဗ္ဗတ္တေဿာမိ. သစေ အာရုပ္ပါ အတ္ထိ၊ တတ္ထ နိဗ္ဗတ္တိဿာမိ. သစေ နတ္ထိ၊ ရူပါဝစရဗြဟ္မလောကေ နိဗ္ဗတ္တိဿာမိ. ဧဝံ မေ အပဏ္ဏကော ဓမ္မော အပဏ္ဏကောဝ အဝိရဒ္ဓေါဝ ဘဝိဿတီ’’တိ တထာ ပဋိပဇ္ဇတိ.

၁၀၄. ဘဝနိရောဓောတိ နိဗ္ဗာနံ. သာရာဂါယ သန္တိကေတိ ရာဂဝသေန ဝဋ္ဋေ ရဇ္ဇနဿ သန္တိကေ. သံယောဂါယာတိ တဏှာဝသေန သံယောဇနတ္ထာယ. အဘိနန္ဒနာယာတိ တဏှာဒိဋ္ဌိဝသေန အဘိနန္ဒနာယ. ပဋိပန္နော ဟောတီတိ အယမ္ပိ လာဘီ ဝါ ဟောတိ တက္ကီ ဝါ. လာဘီ နာမ အဋ္ဌသမာပတ္တိလာဘီ. တဿ အာရုပ္ပေ ကင်္ခါ နတ္ထိ၊ နိဗ္ဗာနေ အတ္ထိ. သော – ‘‘အဟံ နိရောဓော အတ္ထီတိပိ နတ္ထီတိပိ သုဏာမိ၊ သယံ န ဇာနာမိ. သမာပတ္တိံ ပါဒကံ ကတွာ ဝိပဿနံ ဝဍ္ဎေဿာမိ. သစေ နိရောဓော ဘဝိဿတိ၊ အရဟတ္တံ ပတွာ ပရိနိဗ္ဗာယိဿာမိ. နော စေ ဘဝိဿတိ၊ အာရုပ္ပေ နိဗ္ဗတ္တိဿာမီ’’တိ ဧဝံ ပဋိပဇ္ဇတိ. တက္ကီ ပန ဧကသမာပတ္တိယာပိ န လာဘီ၊ အာရုပ္ပေ ပနဿ ကင်္ခါ နတ္ထိ၊ ဘဝနိရောဓေ အတ္ထိ. သော – ‘‘အဟံ နိရောဓော အတ္ထီတိပိ နတ္ထီတိပိ သုဏာမိ၊ သယံ န ဇာနာမိ၊ ကသိဏပရိကမ္မံ ကတွာ အဋ္ဌသမာပတ္တိယော နိဗ္ဗတ္တေတွာ သမာပတ္တိပဒဋ္ဌာနံ ဝိပဿနံ ဝဍ္ဎေဿာမိ. သစေ နိရောဓော ဘဝိဿတိ၊ အရဟတ္တံ ပတွာ ပရိနိဗ္ဗာယိဿာမိ. နော စေ ဘဝိဿတိ၊ အာရုပ္ပေ နိဗ္ဗတ္တိဿာမီ’’တိ ဧဝံ ပဋိပဇ္ဇတိ. ဧတ္ထာဟ – ‘‘အတ္ထိ ဒိန္နန္တိအာဒီနိ တာဝ အပဏ္ဏကာနိ ဘဝန္တု၊ နတ္ထိ ဒိန္နန္တိအာဒီနိ ပန ကထံ အပဏ္ဏကာနီ’’တိ. ဂဟဏဝသေန. တာနိ ဟိ အပဏ္ဏကံ အပဏ္ဏကန္တိ ဧဝံ ဂဟိတတ္တာ အပဏ္ဏကာနိ နာမ ဇာတာနိ.

၁၀၅. စတ္တာရောမေတိ အယံ ပါဋိဧက္ကော အနုသန္ဓိ. နတ္ထိကဝါဒေါ၊ အဟေတုကဝါဒေါ အကိရိယဝါဒေါ၊ အာရုပ္ပါ နတ္ထိ နိရောဓော နတ္ထီတိ ဧဝံဝါဒိနော စ ဒွေတိ ဣမေ ပဉ္စ ပုဂ္ဂလာ ဟေဋ္ဌာ တယော ပုဂ္ဂလာဝ ဟောန္တိ. အတ္ထိကဝါဒါဒယော ပဉ္စ ဧကော စတုတ္ထပုဂ္ဂလောဝ ဟောတိ. ဧတမတ္ထံ ဒဿေတုံ ဘဂဝါ ဣမံ ဒေသနံ အာရဘိ. တတ္ထ သဗ္ဗံ အတ္ထတော ဥတ္တာနမေဝါတိ.

ပပဉ္စသူဒနိယာ မဇ္ဈိမနိကာယဋ္ဌကထာယ

အပဏ္ဏကသုတ္တဝဏ္ဏနာ နိဋ္ဌိတာ.

ပဌမဝဂ္ဂဝဏ္ဏနာ နိဋ္ဌိတာ.