၉. ဒုတိယသူစိဝိမာနဝဏ္ဏနာ

ဥစ္စမိဒံ မဏိထူဏန္တိ ဒုတိယသူစိဝိမာနံ. တဿ ကာ ဥပ္ပတ္တိ? ဘဂဝါ ရာဇဂဟေ ဝိဟရတိ ဝေဠုဝနေ. တေန သမယေန ရာဇဂဟဝါသီ ဧကော တုန္နကာရကော ဝိဟာရပေက္ခကော ဟုတွာ ဝေဠုဝနံ ဂတော. တတ္ထ အညတရံ ဘိက္ခုံ ဝေဠုဝနေ ကတသူစိယာ စီဝရံ သိဗ္ဗန္တံ ဒိသွာ သူစိဃရေန သဒ္ဓိံ သူစိယော အဒါသိ. သေသံ သဗ္ဗံ ဝုတ္တနယမေဝ.

၉၅၂. ‘‘ဥစ္စမိဒံ မဏိထူဏံ ဝိမာနံ။ပေ။

ဝဏ္ဏော စ တေ သဗ္ဗဒိသာ ပဘာသတီ’’တိ. – ပုစ္ဆိ၊

၉၅၆. ‘‘သော ဒေဝပုတ္တော အတ္တမနော။ပေ။ ယဿ ကမ္မဿိဒံ ဖလံ’’.

၉၅၇. ‘‘အဟံ မနုဿေသု မနုဿဘူတော၊ ပုရိမဇာတိယာ မနုဿလောကေ.

၉၅၈. ‘‘အဒ္ဒသံ ဝိရဇံ ဘိက္ခုံ၊ ဝိပ္ပသန္နမနာဝိလံ၊

တဿ အဒါသဟံ သူစိံ၊ ပသန္နော သေဟိ ပါဏိဘိ.

၉၅၉. ‘‘တေန မေတာဒိသော ဝဏ္ဏော။ပေ။ ဝဏ္ဏော စ မေ သဗ္ဗဒိသာ ပဘာသတီ’’တိ.

တံ သဗ္ဗံ ဟေဋ္ဌာ ဝုတ္တနယမေဝ.

ဒုတိယသူစိဝိမာနဝဏ္ဏနာ နိဋ္ဌိတာ.